Afleitt vetrarveður í kortunum

Þó svo að mörgum Íslendingum kunni að hafa verið kalt í morgun ættu þeir að dúða sig enn betur ef marka má kort Veðurstofunnar. Að sögn veðurfræðings sést aðeins „leiðindavetrarveður“ í kortunum næstu vikurnar - „og ekki orð um það meir,“ eins og hann kemst að orði.

Það verður þó hið þokkalegasta veður í upphafi helgarinnar. Norðankaldi í dag með ofankomu norðan og austanlands en annars bjartviðri og nokkuð frost um land allt. Gera má ráð fyrir því að það verði á bilinu 0 til 8 stig í dag en aukist svo næstu daga.

Síðan kemur til með að lægja á morgun og létta til. Allkröpp lægð nálgast þó landið sunnan úr hafi og á sunnudagsmorgun mun ganga í austanstorm með slyddu eða snjókomu syðst á landinu þegar líður á daginn. Hitinn við suðurströndina ætti að vera um frostmark en annars staðar á landinu verður „talsvert frost.“

Veðurhorfur á landinu

Í dag:

Norðlæg átt, 8-15 m/s, hvassast NV-til. Sjókoma eða él á N-verðu landinu, en bjartviðri syðra. Bætir í vind V-til með kvöldinu. Frost yfirleitt 0 til 8 stig, kaldast inn til landsins. Lægir heldur og léttir víða til á morgun, en áfram dálítil él nyrst og kólnar í veðri.

Á laugardag:

Norðan 8-13 m/s NV-lands framan af degi, en annars hæg breytileg átt. Él á N-verðu landinu, en bjart að mestu syðra. Frost 2 til 12 stig, kaldast í uppsveitum.

Á sunnudag:

Gengur í austan 13-20 m/s með slyddu eða snjókomu á SA-verði landinu, hvassast syðst, en úrkomulítið í öðrum landshlutum. Hiti kringum frostmark við S-ströndina, en annars talsvert frost.

Á mánudag:

Allhvöss eða hvöss norðaustanátt með slyddu eða snjókomu, en þurrt að mestu SV-lands. Heldur hlýnandi veður í bili.

Á þriðjudag og miðvikudag:

Útlit fyrir hvassar norðanáttir með ofankomu, en lengst af úrkomulítið sunnan heiða. Áfram kalt í veðri.

Á fimmtudag:

Dregur líklega úr vindi og rofar til, en áfram kalt í veðri.