Pöntun Emirates bjargaði smíði Airbus risaþotunnar

Framleiðslu stærstu farþegaþotu heims, Airbus A380, var bjargað í dag þegar Emirates-flugfélagið pantaði allt að 36 eintök. Airbus hefði að öðrum kosti hætt smíði risaþotunnar vegna sölutregðu. Fjallað var um málið í fréttum Stöðvar 2 og sýndar myndir úr verksmiðjum Airbus í Toulouse í Frakklandi. 

Ekki eru nema tíu ár frá því Airbus A380 þotan var tekin í notkun. Þessi stærsta farþegaþota heims getur tekið allt að 850 farþega á tveimur hæðum en algengast er að hún sé innréttuð með um 500 sætum. Sem flaggskipi Airbus var henni ætlað að skáka júmbó-þotum Boeing og sýna umheiminum að evrópski flugvélaframleiðandinn væri kominn fram úr þeim bandaríska. 

Þróunarkostnaður vélarinnar varð hins vegar nærri þrefalt meiri en upphaflegar áætlanir gerðu ráð fyrir, tafir urðu á framleiðslu hennar, en það sem verra var: Þegar hún loksins var tilbúin höfðu flugfélög misst áhuga á að reka fjögurra hreyfla þotur þegar fram komu hagkvæmari tveggja hreyfla stórar breiðþotur.

Af samtals 317 seldum þar til í dag höfðu 222 eintök verið afhent til 13 flugfélaga. Pantanir reyndust mun færri en Airbus hafði vonast til og síðustu tvö ár barst engin ný pöntun. Það stefndi því í að smíði þotunnar yrði hætt og staðfesti Airbus í síðustu viku að fyrirtækið ætti ekki annan kost en að loka framleiðslulínunni ef ekki seldust fleiri vélar. 

Í dag birtist svo bjargvætturinn í Sameinuðu arabísku furstadæmunum, Emirates-flugfélagið í Dubai, sem skrifaði undir skuldbindandi samninga um 20 þotur með valkosti um 16 aðrar til viðbótar. Samkvæmt verðlista kostar hvert eintak um 45 milljarða króna en samningurinn tryggir að risaþotan verður framleidd að minnsta kosti í tíu ár í viðbót. 

Hér má sjá frétt Stöðvar 2: