Engin hlýindi á næstunni

Það munu eflaust margir landsmenn fagna því, eftir hamaganginn undanfarna daga, að Veðurstofan geri ráð fyrir „rólegheitaveðri“ í dag.

Þó má gera ráð fyrir því að það verði kalt í veðri og dálítilli él hér og þar, einkum við sjávarsíðuna. Frostið verður yfirleitt á bilinu 0 til 8 stig og kaldast inn til landsins. Það fer svo að hvessa á morgun og mun bæta í ofankomu á norðanverðu landinu en léttir til syðra.

„Ekki er að sjá nein hlýindi á næstunni, enda varla við því að búast við upphaf þorra,“ segir veðurfræðingur en bætir við að nú hækki hins vegar sólin stöðugt á lofti - „og verður morgundagurinn heilum 5 mínútum lengri en dagurinn í dag.“

Veðurhorfur á landinu næstu daga

Á föstudag:

Norðlæg átt, 8-15 m/s og snjókoma eða él víða á landinu, hvassast NV-til, en hægara og léttskýjað syðra. Dregur úr vindi og ofankomu um kvöldið. Frost 0 til 8 stig, mest inn til landsins. 

Á laugardag:

Fremur hæg breytileg átt, skýjað með köflum og él á stöku stað. Vaxandi A-átt og þykknar upp S-til um kvöldið. Frost 0 til 12 stig, kaldast í innsveitum NA-lands. 

Á sunnudag:

Útlit fyrir allhvassa austanátt með slyddu eða snjókomu SA-til á landinu, en annars hægara og úrkomulítið. Heldur hlýnandi veður. 

Á mánudag:

Líklega hæg austlæg átt með éljum, einkum austanlands. Kólnar í veðri. 

Á þriðjudag og miðvikudag:

Líkur á hvössum austan- og norðaustanvindum með talsverðri ofankomu, einkum A-til. Svalt í veðri.