Vetrarfærð í kortunum

Veðurstofa Íslands hefur gefið út gula viðvörun fyrir höfuðborgarsvæðið, Faxaflóa og Suðurland. Viðvörunin er í gildi frá klukkan sex í kvöld til miðnættis á morgun. Búast má við að færð á heiðum spillist.

„Það er búið að ganga á með éljum og skúrum til skiptist í morgun en þetta verður slydda og snjókoma í kvöld og éljagangur í nótt og á morgun,“ segir vakthafandi veðurfræðingur á Veðurstofunni í samtali við Vísi.

Á höfuðborgarsvæðinu má gera ráð fyrir talsverðri slyddu eð snjókomu um tíma með takmörkuðu skyggni, þ.a. færð gæti spillst, einkum í efri byggðum og á það einkum við Breiðholt, Norðlingaholt og Grafarholtið.

„Á þessu svæði verða kannski einhverjir sentimetrar af snjó á morgun en ekkert til þess að hafa áhyggjur af,“ segir veðurfræðingur.

Á Suðurlandi og á Faxaflóa má gera ráð fyrir að skyggni á heiðum geti verið mjög lítið og færð þar spillst, svo sem á Hellisheiði og á Mosfellsheðið. Gert er ráð fyrir 15-23 m/s sunnan eða suðvestan vindátt með snjókomu eða éljagangi á þessu svæði.

Veðurhorfur á landinu

Sunnan og suðvestan 10-18 m/s og élja- eða skúahryðjur, en léttskýjað NA-lands. Hvessir seinni partinn, 15-23 og rigning eða slydda á S-verðu landinu í kvöld, en snjókoma í uppsveitum. Hvessir einnig talsvert og snjóar um tíma N-til eftir miðnætti. Hiti 0 til 5 stig.

Snýst í suðvestan 13-23 með éljagangi upp úr miðnætti, fyrst V-lands. Heldur hægari og léttir víða til NA-til á morgun. Vægt frost víðast hvar.

Veðurhorfur á landinu næstu daga

Á mánudag:

Norðan- og norðvestan 13-20 m/s, hvassast við A-ströndina. Éljagangur, en rofar smám saman til á S-verðu landinu. Frost 1 til 12 stig, minnst syðst.

Á þriðjudag, miðvikudag, fimmtudag og föstudag:

Norðlægar áttir og snjókoma eða él á norðanverðu landinu, en úrkomulítið syðra. Áfram kalt í veðri, en minnkandi frost undir helgi.