Næsti hvellur á miðvikudag

Samkvæmt nýjustu spákortum Veðurstofunnar virðist næsta lægð ganga yfir landið á miðvikudag. Henni mun að öllum líkindum fylgja talsverð rigning á sunnanverðu landinu og mun ganga í storm eða rok. Þess vegna eru gular viðvaranir í gildi fyrir allt landið á miðvikudag. Spár gera ráð fyrir að um snarpan hvell sé að ræða og stendur versta veðrið yfir í 4-5 klukkustundir á hverjum stað.

Veðurhæðin virðist þó vera heldur minni en í eldri líkanakeyrslum, að sögn veðurfræðings. „Það er þó ennþá nokkuð langt í miðvikudag og spár verða nákvæmari og óvissa minni þegar að nær dregur,“ bætir hann við.

Léttir til á Norðurlandi

Í um 650 kílómetra suðvestur af Reykjanestá er 965 mb lægð og eru skil frá henni að ganga yfir allt landið þessa stundina.

Eftir skilin verður hægari sunnanátt í skamman tíma, en hvessir svo aftur upp í sunnan 13 til 18 m/s, sunnanáttin verður allsráðandi síðdegis. Það rignir víða á láglendi, einkum um landið sunnanvert en léttir til um landið norðanvert er líður á daginn og rigningin verður að skúrum sunnan- og vestantil. Hitinn verður á bilinu 2 til 8 stig.

Suðvestlægari vindur í nótt og veður fer kólnandi, slydduél í nótt en él á morgun og bjartviðri um landið austanvert.

Veðurhorfur á landinu næstu daga 



Á þriðjudag:

Suðvestan 10-15 m/s og él, en heldur hægari og léttskýjað norðaustan- og austanlands. Vægt frost, en hiti rétt yfir frostmarki með suður- og vesturströndinni.

Á miðvikudag:

Útlit fyrir sunnan storm, en mögulega rok eða ofsaveður vestantil á landinu. Snjókoma, slydda eða rigning, talsverð úrkoma á sunnanverðu landinu. Hlýnar í veðri, hiti 1 til 6 stig á láglendi uppúr hádegi. Lægir seinnipartinn, fyrst vestast. Suðvestan 8-15 um kvöldið, él og kólnandi veður, en áfram hvasst og rigning eða slydda austast.

Á fimmtudag:

Suðvestan 13-18 og él, en heludr hægari og léttskýjað norðaustantil. Frost um land allt.

Á föstudag:

Sunnan stormur eða rok með talsverðri rigningu eða slyddu en úrkomuminna fyrir norðan. Hiti 2 til 7 stig.

Á laugardag:

Suðvestan átt og él, en bjartviðri á Norður- og Austurlandi. Hiti kringum frostmark.

Á sunnudag:

Suðlæg átt og rigning um austanvert landið en þurrt vestantil. Hlýnar í veðri.