Brotist inn á heimili Sunnu

Brotist var inn á heimili Sunnu Elvíru Þorkelsdóttur á Malaga í dag. Þetta kom fram í kvöldfréttum Stöðvar 2 en þar var rætt við Sunnu á sjúkrahúsinu þar sem hún liggur inni á Malaga. Um er að ræða heimilið þar sem Sunna og eiginmaður hennar bjuggu. Þau hafa nú sett það á sölu.

Greint var frá því að samtal sé hafið á milli lögreglu á Íslandi og lögreglu á Spáni þess efnis að lögreglan á Íslandi taki yfir rannsókn á máli Sunnu. Verði það að veruleika verður unnt að flytja Sunnu heim til Íslands. Fjórar vikur eru liðnar síðan hún slasaðist alvarlega við fall ytra.

Sjúkraflugvélin, sem landsmenn söfnuðu fyrir þegar fréttist af slysi Sunnu, er í biðstöðu í Þýskalandi. Mun véllin flytja hana heim til Íslands þegar það verður leyfilegt. Sunna sagði í kvöldfréttum Stöðvar 2 að hún æltaði sér að komast heim undir íslenskar læknishendur. Af og frá væri að hún ætlaði að flýja nokkuð. 

Mál Sunnu hefur vakið athygli flestra landsmanna frá því hún féll niður af svölum á heimili sínu á Malaga á Spáni þann 17. janúar síðastliðinn. Sunna Elvíra lamaðist fyrir neðan brjóst og hefur verið kallað eftir því að hún verði flutt á hátæknisjúkrahús svo hún geti fengið betri umönnun.

Sunna er í ótímabundnu farbanni á Spáni en eiginmaður hennar, Sigurður Kristinsson, situr í gæsluvarðhaldi á Íslandi grunaður um aðild að umfangsmiklu fíknefnamáli.

Trúir því að maðurinn hennar hafi ekki átt þátt í fallinu

Fjallað var ítarlega um málið í kvöldfréttum Stöðvar 2 og Íslandi í dag þar sem rætt var við Sunnu á Malaga. Líkt og fyrr segir slasaðist Sunna þegar hún féll niður af svölum á heimili sínu. Eiginmaður hennar var handtekinn grunaður um að hafa hrint henni. Honum var sleppt úr haldi þremur dögum síðar.

„Ég fékk höfuðhögg og minnið mitt er ekki komið aftur.  Það tekur tíma segja læknarnir,“ segir Sunna.

„Ég vona að það komi í ljós seinna meir. Ég trúi því að maðurinn minn hafi ekki átt neinn þátt í þessu. Hann er ekki ofbeldismaður. Þannig ég held ég geti fullyrt að hann hafi ekki komið að þessu.“

„Erfitt að heyra það“

Sunna var yfirheyrð fyrir um tveimur vikum vegna rannsóknar lögreglu á meintum fíkniefnainnflutningi eiginmanns hennar.

Hann er talinn hafa sent skákmunina sem voru fylltir fíkniefnum á Skáksamband Íslands. Fleiri hafa verið handteknir og úrskurðaðir í gæsluvarðhald vegna málsins.

Sunna Elvíra segist ekkert hafa hitt mann sinn eftir slysið.

„Hann mátti ekki koma að sjá mig hérna á spítalanum. Hann var í heimsóknarbanni samkvæmt fyrirmælum lögreglu. Og síðan frétti ég það seinna að hann hafi verið handtekinn heima. Að hann hafi farið heim og verið handtekinn á flugvellinum.  Og það er rosalega erfitt að heyra það. Það kom mér gjörsamlega í opna skjöldu að hann hafi verið handtekinn fyrir þetta svokallaða skáksmyglsmál.“

Þú vissir ekki að hann væri að senda fíkniefni til Íslands?

„Ekki hugmynd og mér bara krossbrá. Þetta er náttúrulega alveg óhugsandi og þegar ég hugsa til baka einmitt, var eitthvað einkennilegt í fari hans? Var hann eitthvað öðruvísi en venjulega? og það er ekkert sem ég get fest reiður á.“

Unnið að því að fá hana flutta á annan spítala

Kristján Andri Stefánsson, sendiherra Íslands í Frakklandi, kom til Malaga í dag og sagði í kvöldfréttum Stöðvar 2 að unnið væri að því að íslenska utanríkisþjónustan gæti orðið sem best að liði í þessum erfiðu aðstæðum.

Þar er meðhöndlun á meiðslum Sunnu sett í forgang en Kristján mun funda með yfirvöldum á Malaga á morgun þar sem markmiðið verður að fá Sunnu flutta á spítala á Sevilla. Vonir standa til að hægt verði að vísa henni á bæklunardeild á Toledo. 

Sunna Elvíra hlaut mænuskaða við fallið, er lömuð fyrir neðan brjóst, og hefur verið gagnrýnt að hún fái ekki viðeigandi meðhöndlun á sjúkrahúsinu á Malaga. Foreldrar hennar hafa hlúð að legusárum Sunnu í samráði við lækna á Íslandi.

Móðir hennar, Unnur Birgisdóttir, segist fyrst og fremst leggja áherslu á að dóttir sín komist undir læknishendur á Íslandi sem fyrst.

Hér fyrir neðan má sjá umfjöllun Íslands í dag um mál Sunnu Elvíru.