Formaður ÍTF segir kergju út í KSÍ

Haraldur Haraldsson, formaður ÍTF - hagsmunasamtaka félaga í efstu deildum karla og kvenna og Inkasso-deildinni, segir að knattspyrnuhreyfingin hafi áhyggjur af því að grasrótin gleymist í því mikla góðæri sem nú er hjá KSÍ.

„Við höfum áhyggjur af því að grasrótin gleymist aðeins. Velta knattspyrnusambandsins hefur aukist gífurlega á síðustu árum og hefur dálitlar áhyggjur af því að þetta verði of landsliðsmiðað,” sagði Haraldur í samtali við Guðjón Guðmundsson í kvöld.

ÍTF lagði fram tillögu um helgina að þeir fengu áheyrnafulltrúa í stjórn KSÍ, en því var frestað og ekkert gert úr því á ársþinginu.

„Við viljum stíga inn í það með KSÍ svo það gerist ekki. Okkur finnst að okkur vanti rödd og við lögðum meðal annars fram í breytingartillögum að ÍTF fái tvo áheyrnafulltrúa í stjórn KSÍ.”

„Það fór þvert ofan í menn og reyndist stóri liðurinn í því að þessu var vísað frá. Það eru allir að vilja gerðir, en við þurfum að nýta tækifærið núna og ræða málin,” sagði Haraldur sem segir að það sé kergja í félaginu.

„Það er búið að vera smá kergja. Það er ekkert að ástæðulausu að 19 af 24 liðum í efstu deildunum leggja fram þessar lagabreytingar. Það býr mikið að baki. Það er ljóst,” sagði Haraldur.

Allt innslagið má sjá hér að ofan.