Merkel finnur arftaka sinn í Saarlandi

Annegret Kramp-­Karren­bauer, forsætisráðherra í Saarlandi, einu af minnstu sambandsríkjum Þýskalands, hefur lengi verið orðuð við að verða arftaki Angelu Merkel kanslara í þýskum stjórnmálum.

Þýskir miðlar hafa kallað hana „Mini-Merkel“ og hún er vinsæl innan raða flokks þeirra, Kristilegra demókrata (CDU), eftir kosningasigur í Saarlandi í fyrra þar sem CDU jók meirihluta sinn þrátt fyrir að útlit væri fyrir að Jafnaðarmannaflokkurinn (SPD) bæri sigur úr býtum. 

Nú virðist enn líklegra að Kramp-Karrenbauer sé væntanlegur arftaki Merkel en kanslarinn lýsti í gær yfir stuðningi við hana í baráttunni um aðalritarastól flokksins. Frá þessu greindu fjölmargir þýskir miðlar.

Peter Tauber, fráfarandi aðalritari, segir af sér í dag og sagði Deutsche Welle að hann hafi tekið þá ákvörðun vegna baráttu sinnar við alvarleg veikindi. Fyrir það þvertóku þó heimildarmenn DPA og sögðu veikindi ekki ástæðuna.

Kjörtímabili Taubers átti að ljúka í desember næstkomandi en nú er útlit fyrir að eftirmaður hans verði valinn á flokksþingi þann 26. febrúar næstkomandi. Á þinginu munu flokksmenn jafnframt greiða atkvæði um hvort mynda eigi ríkis­stjórn með SPD en samkomulag náðist á milli flokkanna fyrr í mánuðinum eftir margra mánaða stjórnarkreppu. Nokkur óánægja er sögð ríkja í flokknum með samkomulagið, einkum vegna þess að SPD fær fjármálaráðuneytið.

Óánægja með samkomulagið og væntanlegt samstarf er einnig greinileg á meðal jafnaðarmanna. Martin Schulz, þáverandi leiðtogi flokksins, sagði á kosninganótt í ljósi afhroðsins sem flokkurinn galt í kosningum síðasta árs að flokkurinn yrði í stjórnarandstöðu á kjörtímabilinu. Schulz gekk á bak orða sinna eftir mánaðalanga stjórnarkreppu og komst að samkomulagi við CDU um áframhaldandi samstarf hins svokallaða stórbandalags.

Óljóst er hvort SPD samþykkir samstarf við CDU. Atkvæðagreiðsla um samstarfið hefst í dag á meðal nærri 500.000 flokksmanna SPD og greiða þeir atkvæði með pósti. Líklegt þykir að samstarfið verði samþykkt.

Bild am Sonntag greindi frá því um helgina að 26 af þeim 35 borgarstjórum sem SPD á í stórum borgum og bæjum styðji samstarfið. Þá sýndi könnun Kantar Emnid á föstudag að tveir af hverjum þremur styddu samstarfið.

Nú mælist Jafnaðarmannaflokkurinn með um sextán prósenta fylgi ef marka má könnun Forsa frá því á föstudag. Svo lítið fylgi hefur flokkurinn ekki fengið í kosningum frá því 1887 þegar hann fékk 10,1 prósent greiddra atkvæða, að undanskildum þeim tvennu kosningum á síðustu öld þar sem nasistar voru einir í framboði.

Merkel lagði til á fundi framkvæmdastjórnar flokksins í gær að Kramp-Karrenbauer yrði nýr aðalritari og samkvæmt heimildarmanni Reuters af fundinum var einróma stuðningur við þá hugmynd kanslarans. Þykir því líklegt að Kramp-Karrenbauer verði valin aðalritari á flokksþinginu.

„Við höfum þekkst lengi og treystum hvor annarri, þrátt fyrir ólíkar skoðanir á hinu og þessu,“ sagði Merkel við blaðamenn í gær. Aðspurð um hvort Kramp-Karrenbauer væri væntanlegur arftaki hennar sagði Merkel: „Ykkar forréttindi eru að þið getið verið þrjá hringi á undan öðrum. Við stjórnmálamenn þurfum að fást við viðfangsefni dagsins í dag.“

Sjálf var Merkel aðalritari CDU áður en hún varð kanslari og þykir stuðningur kanslarans því benda sterklega til þess að Merkel hafi fundið arftaka sinn.