Mældu gasstyrk í Kristalnum

Lögreglan og slökkviliðið á Suðurlandi, í samvinnu við Veðurstofu Íslands, mældu í dag gasstyrk í Kristalnum, íshelli í Breiðamerkurjökli, vegna tilkynninga sem bárust í gær um gasmengun þar.

Að því er fram kemur í tilkynningu frá Veðurstofunni sýndu mælingarnar ekki mælanlega styrk brennisteinsvetnis (H2S), brennisteinstvíoxíðs (SO2) og kolmonoxíðs (CO). Þá gaf súrefnismæling eðlilegar niðurstöður auk þess sem enga lykt var að finna á svæðinu eða í hellinum.

„Það verður því að ætla að gasmengunin, sem menn urðu varir við í gær, hafi verið tilfallandi og staðið stutt yfir, en orsök og uppruni hennar er óþekktur. Ekki er vitað um nýlegar jarðhræringar á upptakasvæði þess vatns sem kemur fram undan Breiðamerkurjökli. Gasmengunin í gær sýnir að gæta þarf ýtrustu varkárni þegar farið er um íshella hér á landi,“ segir í tilkynningu Veðurstofunnar.