Neyðarástand vegna meiriháttar olíuleka við Indónesíu

Stjórnvöld á Indónesíu hafa lýst yfir neyðarástandi vegna olíuleka í hafinu undan ströndum Borneó. Fjórir sjómenn fórust um páskahelgina þegar kviknaði í olíunni. Uppruni lekans liggur enn ekki fyrir en hundruð manna hafa tilkynnt um öndunarerfiðleika, ógleði og uppsala vegna mengunarinnar.

Olíubrákin þekur nú um tólf ferkílómetra svæði í hafinu utan við þessa stærstu eyju Asíu. Lekans varð fyrst vart á laugardag en hann hefur síðan breiðst út. Yfirvöld hafa áhyggjur af vaxandi eldhættu af völdum hans, að því er segir í frétt breska ríkisútvarpsins BBC.

Stór olíuhreinsistöð á vegum ríkisolíufyrirtækisins Petramina er í bænum Balikpapan þar sem lekans varð vart. Talsmenn fyrirtækisins segja að neðansjávarleiðsla þess hafi ekki brostið og neita ábyrgð á lekanum.

Stjórnandi hreinsistöðvarinnar segir að um eldsneytisolíu sé að ræða, ekki hráolíu.