At­kvæða­greiðslu um á­skorun til Ragnars á þingi kennara frestað

Atkvæðagreiðslu um áskorun sem lögð var fram á þingi Kennarasambands Íslands til Ragnars Þórs Péturssonar, tilvonandi formanns KÍ, um að hann myndi endurnýja umboð sitt var frestað til morgundagsins, að sögn Hönnu Bjargar Vilhjálmsdóttur, forkonu jafnréttisnefndar KÍ, en hópur kvenna innan Kennarasambandsins lagði tillöguna fram. Mun atkvæðagreiðslan fara fram undir liðnum önnur mál en sá liður er á dagskrá klukkan 14.30 á morgun.

Áskorunin snýr að því að Ragnar taki ekki við formennsku í KÍ að svo stöddu heldur fái endurnýjað umboð frá kennurum. Ástæðan eru ásakanir sem komið hafa fram á hendur Ragnari um að hann hafi sýnt Ragnari Þór Marinóssyni, Ragga, klám á heimili þess fyrrnefnda en Raggi bjó þá á Tálknafirði þar sem Ragnar Þór starfaði sem kennari.

Raggi sagði sögu sína í viðtali við Vísi í desember í fyrra en Ragnar Þór hefur ávallt haldið því fram að ásakanirnar séu rangar. Í gær var svo greint frá því á vef Stundarinnar að tveir fyrrverandi nemendur Ragnars segja hann hafa „borið rangt um ýmsar staðreyndir“ þegar hann hefur varist ásökunum Ragga.

Ragnar Þór bloggaði um þessa yfirlýsingu í gær þar sem segir meðal annars:

„Þessu var líka haldið fram í desember í fyrra og þá gerði ég enga athugasemd við þetta atriði. Einhverjir nemendur bönkuðu upp á og komu til okkar í heimsókn. Þetta allt sagði ég blaðamanni á sínum tíma og hef ekkert reynt að fela í þeim efnum.

 

Ég hef reynt að sýna RÞM og fjölskyldu hans nærgætni í málinu þrátt fyrir að ýmsu hafi verið haldið fram sem hvorki er forsvaranlegt né löglegt. Ýmsir hafa hvatt mig til að ganga miklu harðar fram og leita réttar míns.“

Segir málið snúast um trúverðugleika

Hanna Björg segist í samtali við Vísi ekki vita hvers vegna atkvæðagreiðslu um tillöguna var frestað. Það sé ákvörðun þingforseta en Hanna segir að tillagan hafi staðist ströngustu kröfur um þingsköp. Í tillögunni er lagt til að leynileg atkvæðagreiðsla fari fram um áskorunina án umræðna, að sögn Hönnu Bjargar.

Hanna Björg segist málið snúast um trúverðuleika KÍ og kennarastéttarinnar. Það snúist ekki um að dæma um sekt eða sakleysi. Hún segir að framundan sé mikil vinna innan KÍ vegna MeToo-byltingarinnar og setur málið í samhengi við það.

„Við erum að fara í fullt af aðgerðum sem voru samþykktar hérna í jafnréttisnefnd. Er trúverðugt að hann verði leiðtogi í þeirri vegferð?“ spyr Hanna.Hún segir að það sem komið hafi fram undanfarið, með viðtalinu við Ragga og svo yfirlýsingunni í gær, hafi ekki legið fyrir fyrir formannskosningarnar. Áskorunin snúist um að Ragnar Þór fái endurnýjað umboð í ljósi þeirra upplýsinga.

Ragnar Þór bloggað um áskorunina í dag þar sem hann segir að hann hafi fengið fyrstu ábendingarnar fyrir nokkrum vikum um að til stæði að reyna að koma í veg fyrir að hann tæki við formennsku KÍ á þinginu sem nú fer fram.

„Rétt fyrir þing fjölgaði viðvörununum og mér var sagt að nota ætti ásökun um að ég hefði sýnt nemanda klám fyrir tuttugu árum sem átyllu.

Nú liggur fyrir að lögð verður fram ósk til mín um að taka ekki við forystu.

„Það er bara höfðað til hans, í raun¬inni, siðferðis,“ er sagt um áskorunina.

Í þessu máli öllu hef ég reynt að sýna siðferðisþrek og gera það sem er rétt. Það er rangt sem fram kemur að ég hafi fengið margítrekaðar ásakanir. Þetta er ein ásökun sem byggir á minningu drengs um klám í tölvu (sem lýst er og ekki var til á þessum tíma). Hún fékk sína leið í kerfinu. Að auki var ferill minn og búseta frá því ég hóf störf við kennslu fyrir meira en tuttugu árum rannsakaður af barnaverndaryfirvöldum. Ekkert misjafnt kom í ljós enda er ferill minn mjög farsæll,“ segir í bloggi Ragnars sem lesa má hér.

Fréttin hefur verið uppfærð.