Drengur gekk berserksgang á heimili sínu

Lögreglan var send að heimahúsi í Kópavogi á öðrum tímanum í nótt eftir að húsráðendur óskuðu eftir aðstoð. Þegar lögreglumenn komu á vettvang var allt á rúi og stúi en í skeyti lögreglunnar segir að sonurinn á heimilinu hafi gengið berskerksgang - brotið allt og bramlað.

Drengurinn var handtekinn og fluttur á lögreglustöðina á Hverfisgötu þar sem hann hefur fengið að dvelja í fangaklefa í nótt. Ekki fylgir sögunni hvað hann er gamall eða hvaða ástæða býr að baki hamaganginum.

Lögreglan hafði jafnframt hendur í hári tveggja ökumanna sem grunaðir eru um akstur undir áhrifum vímuefna. Þá færði hún einnig ölvaða konu, sem sofnað hafði áfengissvefni á skemmtistað í miðborg Reykjavíkur, í fangageymslu. Þar verður hún vistuð þangað til af henni rennur, að sögn lögreglunnar.