Bandarískir sjóðir keyptu í Marel fyrir um 1.500 milljónir

Tveir fjárfestingarsjóðir í stýringu American Funds, dótturfélags bandaríska eignastýringarfyrirtækisins Capital Group, keyptu nýlega í Marel fyrir tæplega 1.500 milljónir króna miðað við núverandi gengi hlutabréfa félagsins. Samkvæmt lista yfir alla hluthafa Marels í gær, sem Markaðurinn hefur séð, eiga sjóðirnir samanlagt 3,85 milljónir hluta í félaginu, eða sem nemur um 0,56 prósenta eignarhlut.

Þannig á hlutabréfasjóðurinn SMALLCAP World Fund rúmlega 2,9 milljónir hluta í Marel í dag á meðan sjóðurinn American Fund Insurance Series fer með liðlega 928 þúsund hluti í félaginu. Samkvæmt heimildum Markaðarins komu sjóðirnir fyrst inn í hluthafahóp Marels í síðasta mánuði en það var Arion banki sem hafði milligöngu með kaupum þeirra á bréfum í félaginu. Bandaríska fyrirtækið Capital Group, eitt stærsta og elsta eignastýringarfyrirtæki í heiminum, er samtals með eignir í stýringu að jafnvirði um 1,7 þúsund milljarða Bandaríkjadala.

Núverandi eignarhlutur bandarísku sjóðanna skilar þeim ekki á opinberan lista yfir tuttugu stærstu hluthafa Marels. Eini erlendi fjárfestirinn í þeim hópi er bandaríska fyrirtækið MSD Partners, sjöundi stærsti hluthafi félagsins með 3,34 prósenta eignarhlut, sem kom inn í hluthafahóp Marels í febrúar í fyrra þegar það keypti hlut af Eyri Invest. Hlutabréfaverð Marels hefur hækkað um liðlega tuttugu prósent á þessu ári og miðað við núverandi gengi bréfa félagsins, sem er 383 krónur á hlut, nemur markaðsvirði þess um 282 milljörðum króna.

Stærst í Kauphöllinni

Afkoma fyrirtækisins undanfarin misseri hefur verið afar góð. Á fyrsta ársfjórðungi þessa árs námu tekjur Marels rúmlega 288 milljónum evra og jukust þær um 14 prósent á milli ára. Þá var hagnaður félagsins fyrir fjármagnsliði, afskriftir og skatta (EBITDA) 55,3 milljónir og hækkaði um meira en níu milljónir evra frá sama tíma á árinu 2017. Pantanabókin er einnig í hæstu hæðum og námu nýjar pantanir á fyrsta fjórðungi 329 milljónum evra og jukust um 12 prósent frá fyrra ári. Stendur pantanabók Marels því núna í 529 milljónum evra. Fram hefur komið í uppgjörstilkynningum félagsins að það stefnir að 12 prósenta meðalvexti árlega yfir tímabilið 2017 til 2026.

Marel tilkynnti í byrjun árs að það áformaði að kanna möguleika á skráningu í kauphöll erlendis en fyrirtækið er langsamlega stærsta skráða félagið í Kauphöllinni hér á landi. Í kjölfarið var STJ, óháð alþjóðlegt ráðgjafarfyrirtæki, ráðið til að greina mögulega skráningarkosti Marels.

Stærsti eigandi Marels, með tæplega 26 prósenta hlut, er fjárfestingarfélagið Eyrir Invest, en það er að mestum hluta í eigu feðganna Þórðar Magnússonar, stjórnarformanns Eyris Invest, og Árna Odds Þórðarsonar, forstjóra Marels, og Landsbankans. Aðrir helstu eigendur Marels eru íslenskir lífeyrissjóðir, með samanlagt um 36 prósenta hlut, en í þeim hópi eru Lífeyrissjóður verslunarmanna, Gildi og Lífeyrissjóður starfsmanna ríkisins umsvifamestir í hluthafahópi félagsins.