Rauði baróninn berst við Parkinson og gefur út nýjan slagara

Einn besti knattspyrnudómari Íslandssögunnar, Garðar Örn Hinriksson, er farinn að láta til sín taka í tónlistarheiminum á nýjan leik en veikindi sem hann er að glíma við hafa vakið hann upp í þeim efnum.

Garðar gengur undir listamannsnafninu G Hinriksson á Facebook og fyrir nokkrum dögum síðan opnaði hann sig varðandi veikindi sín en hann er með Parkinson.

„Eftir að Parkinsoninn bankaði á mínar dyr hugsa ég ekki um annað, sérstaklega í ljósi þess að núna er minn síðasti séns á að gera eitthvað. Maður yngist ekkert og ekki hjálpar það heldur til að Parkinsoninn gæti tekið frá mér röddina einn daginn,“ skrifar Garðar, sem oftast gekk undir nafninu Rauði baróninnn, meðal annars í pistli sínum á Facebook.

„Þetta lag kom til mín í draumi. Það vildi ekki yfirgefa mig og var ég sönglandi þetta í einhverjar örfáar vikur áður en ég kláraði svo lagið. En það kom bara einn texti til greina... texti um veikindin mín. Lagið hreinlega öskraði á það. Þó að ég sé stoltur af þessu lagi er þetta samt eina lagið sem ég vildi óska þess að ég hefði ekki þurft að semja.“

Lagið persónulega má heyra hér að ofan og er óhætt að mæla með því. Hörkuslagari sem á eflaust eftir að hljóma á öldum ljósvakans næstu vikur.

„Ég ákvað að koma út úr skápnum með þessi veikindi með lagi. Það er léttir að vera búinn að því,“ segir Garðar Örn en hann greindist með sjúkdóminn fyrir um tveimur árum síðan.

Færslu Garðars í heild sinni má sjá hér að neðan.