Jakob og Vilhjálmur telja ómaklega að Svanhildi vegið

Jakob Frímann Magnússon tónlistarmaður, en hann á jafnframt sæti í Listráði Hörpu, hefur ritað pistil á Facebook-síðu sína, þar sem hann rís upp til varnar Svanhildi Konráðsdóttur, forstjóra Hörpu.

„Hví skyldi Svanhildur Konráðsdóttir þurfa að lækka sig í launum við að hverfa frá eftirsóttri stjórnunarstöðu hjá Reykjavíkurborg í þann vanþakkláta, viðvarandi stresshnút sem rekstur Hörpu er að óbreyttu?“ spyr Jakob Frímann.

En sem kunnugt er hefur gustað um forstjóra og stjórn tónlistarhússins eftir að lunginn af þjónustufulltrúum Hörpu sögðu upp störfum, tæplega 30 talsins. Það var á þeim forsendum að þeim var gert að taka á sig launaskerðingu en á sama tíma bárust fréttir af því að laun Svanhildar voru hækkuð í samræmi við samninga þar um. Svanhildur hafði þá hækkað um sem nemur 20 prósentum alls í samanburði við forvera sinn í starfi, Halldór Guðmundsson.

Fjölmargir sem eru í borgarpólitíkinni nú hafa fordæmt gjörninginn en Svanhildur hefur, eftir að málið kom upp, farið fram á það við stjórn Hörpu að laun hennar verði lækkuð afturvirkt, því friður um húsið sé ofar öðru. Þá hafa ýmsir, svo sem Ellen Kristjánsdóttir tónlistarmaður og Illugi Jökulsson rithöfundur stigið fram og sagst ætla að sniðganga húsið og VR hefur boðað að það ætli að hætta viðskiptum við húsið.

Hatursfull gagnrýni

Jakob heldur áfram:

„Óvinsælar ákvarðanir, sífelldur niðurskurður, endalausar áhyggjur og neikvæð, hatursfull gagnrýni skapar hættulegt álag hverjum þeim sem gefur sig í slíkt starf.

Umræða undanfarinna daga mun vonandi leiða til þess að Hörpu verði skorinn eðlilegur rekstrarstakkur,“ skrifar Jakob og snýr sér þá að því að ræða um það að vert sé að veita af rausn til rekstrar Hörpu.

En, eins og fram hefur komið þá er bókfært tap að fjárhæð 243,3 milljónir varð á rekstri heildarsamstæðu tónlistar- og ráðstefnuhússins Hörpu á síðasta ári. Íslenska ríkið og Reykjavíkurborg, eigendur hússins, lögðu jafnframt til rúmlega tvöfalt hærri upphæð til reksturs Hörpu en árið áður. Framlagið nam 450 milljónum í fyrra samanborið við 191 milljón árið áður.

Finnst hart að Svanhildi vegið

Þá ritar Vilhjálmur Egilsson rektor, sem á sæti í stjórn Hörpu, pistil á sína Facebooksíðu þar sem hann telur ómaklega að Svanhildi vegið.

Sem stjórnarmaður í Hörpu er ég hugsi yfir þeirri miklu orrahríð sem dunið hefur á forstjóranum síðustu daga.

„Mér finnst afar hart gengið fram og hennar málstaður hefur lítinn hljómgrunn fengið. Mér finnst ekki eðlilegt að sitja í skjóli og láta aðra um að taka á sig alla ágjöfina þegar ég ber sjálfur hluta af ábyrgðinni á því hvernig staðan er,“ skrifar Vilhjálmur.

Vilhjálmur stoltur af ráðningu Svanhildar

Hann segist sjálfur hafa átt stóran hlut í að ráða Svanhildi til starfa, eftir viðtöl við valinn hóp umsækjenda um starfið var það eindregin skoðun hans að hún væri hæfust til starfans:

„Í byrjun árs 2017 þegar ráðningarferlið gekk yfir lá fyrir að stjórn Hörpu yrði að semja við hana um laun vegna þess að búið var að breyta lögunum um aðkomu kjararáðs að ákvörðun launa forstjóra Hörpu.

Eins og gengur var nokkur vinna að samræma sjónarmið varðandi launin en á endanum samdist um 1500 þús. kr. mánaðarlaun sem var í hóflegri kantinum miðað við það sem gerðist og gekk hjá æðstu stjórnendum í starfsemi af svipuðu umfangi og hjá Hörpu,“ skrifar Vilhjálmur meðal annars og spyr hversu mörgum stjórnendum sem tóku launalækkanir í kjölfar hrunsins 2008 til baka einu til tveimur árum seinna hafa nuddað viðkomandi starfsmönnum upp úr því að þeir hafi fengið „launahækkanir“?

„Eftir að búið var að semja um launin við Svanhildi kom úrskurður frá kjararáði um lægri laun og hún féllst á að vera á þeim í tvo mánuði þangað til að ábyrgðin á málinu færðist alfarið til stjórnar Hörpu. Mér finnst það ekki vera eðlilegt að tala um „launahækkun“ þegar tímabundinni launalækkun lýkur,“ spyr Vilhjálmur: „Og hvað skyldu margir starfsmenn hafa upplifað það sem „launahækkun“ að fá fyrri umsamin laun á ný?“

Snýst ekki um laun Svanhildar

Viðbrögð við skrifum þeirra Vilhjálms og Jakobs til varnar Svanhildi eru upp og ofan.

Fjölmargir eru ánægðir með þá félaga en svo eru þeir einnig fjölmargir sem benda á að þetta snúist hreint ekki um laun Svanhildar, hvort þau megi heita hófleg eður ei, heldur framkoma forstjóra og stjórnar í garð þjónustufulltrúanna. Verið sé að drepa málum á dreif. Og að það mál sé enn óútkljáð.

Sérstaklega eru heitar umræður á Facebooksíðu Vilhjálms, en þar segir til dæmis Ólína Þorvarðardóttir, fyrrverandi þingmaður Samfylkingar: „Ef stjórnendur ætla að leggja til launalækkun einhvers hóps innan stofnunar eða fyrirtækis eiga þeir sjálfir að taka á sig sömu lækkun og þeir leggja til fyrir aðra. Að öðrum kosti verður enginn trúverðugleiki og heldur engin samstaða um aðgerðina. Skiptir engu máli hver á í hlut. Mín skoðun.“