Faðir árásarmannsins: „Drengurinn átti ekki skotvopn, ég átti skotvopn“

„Sonur minn, fyrir mér, er ekki glæpamaður heldur fórnarlamb,“ segir Antonio Pagourtzis, faðir árásarmannsins unga, sem myrti tíu í framhaldsskóla í Texas á föstudag. Hinn sautján ára gamli Dimitrios Pagourtzis komst yfir haglabyssu og skammbyssu föður síns sem voru notaðar til verknaðarins. Antonio keypti skotvopnin með lögmætum hætti. Átta nemendur létust, tveir kennarar og þá særðust þrettán aðrir.

Telur að Dimitrios hafi verið lagður í einelti

Antionio Pagourtzis telur líklegt að sonur sinn hafi verið lagður í einelti og því undir miklu álagi. Hann hafi kiknað undan byrðunum á föstudaginn. Þetta hefur fréttastofa AP eftir Antionio sem var í símaviðtali hjá Antenna TV.

„Eitthvað hlýtur að hafa gerst í vikunni. Sennilega hefur einhver sært hann. Hann er svo áreiðanlegur drengur að ég veit ekki hvað gæti eiginlega hafa komið fyrir hann. Ég veit ekki hvað gerðist. Ég get aðeins sagt það sem mig, sem faðir, grunar að hafi gerst.“

Rannsakar hvort kennarar hafi lagt Dimitrios í einelti

Verjandi hins grunaða, Nicholas Poehl, segist vera að rannsaka hvort Pagourtzis hafi orðið fyrir einelti af hálfu kennara í skólanum eftir að skýrslur gáfu til kynna að fótboltaþjálfarar hefðu komið illa fram við hann. Skólayfirvöld segjast hafa gert athugun á ásökunum og komist að þeirri niðurstöðu að þær væru ekki á rökum reistar.

Antonio segir son sinn ekki hafa sýnt af sér neina hegðun sem gæfi til kynna að hann væri fær um að beita slíku ofbeldi. Hann hefði aldrei fyrr beitt ofbeldi, hefði ánægju af hreyfingu og hefði aldrei drukkið áfengi.

Þyrmdi sumum til að þau gætu sagt sögu hans

Dimitrios er í haldi lögreglu en foreldrar hans fengu að hitta hann í tuttugu mínútur.

„Ég sá barn. Ég sá ekki barn sem er líka morðingi; heldur ekta barn, barn sem gat ekki horft framan í mig af skömm.“ Segir Antonio. 

Dimitrios hafi hugsað til systra sinna og sagst elska foreldra sína. Hann hafi greint föður sínum frá því að hann var einn um verknaðinn og að hann hafi þyrmt lífi „góðu krakkanna svo þeir gætu sagt sögu hans“.