Vetrarfærð á vegum og ný lægð í aðsigi

Veður verður öllu rólegra í dag en síðustu daga en á morgun tekur við ný lægð með tilheyrandi úrkomu og strekkingsvindi. Þá hefur víða snjóað á landinu í gær og í nótt.

Gert er ráð fyrir fremur hægum vindi í dag og skúrum eða éljum víða um land. Þá verður fremur svalt. Á morgun tekur svo við hvöss sunnanátt og úrkoma sunnan- og vestantil á landinu en veður lægir vestast seint annað kvöld, Lengst af verður þurrt um landið norðaustanvert þó að síðar snúist upp í suðlæga átt, strekkingsvind og úrkomu á köflum, að því er segir í hugleiðingum veðurfræðings á vef Veðurstofu Íslands.

Samkvæmt upplýsingum frá Vegagerðinni er hálka á Holtavörðuheiði og snjóþekja á Fróðarheiði og Vatnaleið. Krapi er á Bröttubrekku og í Dölum. Snjóþekja og hálka er á nokkrum fjallvegum á Vestfjörðum og hálkublettir á Innstrandavegi. Krapi er í Húnavatnssýslum. Hálkublettir eru á Vatnsskarði og Þverárfjalli en krapi á Öxnadalsheiði. Ófært er á Nesjavallaleið. Frekari upplýsingar um færð á vegum landsins má nálgast á vef Vegagerðarinnar.

Veðurhorfur á landinu næstu daga:

Á þriðjudag:

Suðaustan 10-18 m/s með rigningu S- og V-lands, hægari og þurrt á NA-verðu landinu. Hiti 6 til 13 stig, hlýjast norðan heiða.

Á miðvikudag:

Sunnan 5-10 m/s og rigning einkum SA-til, en þurrt N-lands. Hiti 8 til 13 stig.

Á fimmtudag:

Suðlæg eða breytileg átt, 5-10. Rigning, en yfirleitt þurrt NA-til. Hiti 6 til 14 stig, hlýjast NA-lands.

Á föstudag:

Suðvestan 5-13 og skúrir V-lands en bjartviðri annars staðar. Hiti 5 til 13 stig, hlýjast A-til.

Á laugardag:

Suðlæg átt og rigning S- og V-lands en bjartviðri NA-lands. Hiti 7 til 16 stig, hlýjast NA- og A-lands.

Á sunnudag:

Líkur á suðlægri átt, rigning með köflum en bjartviðri A-lands. Hiti 6 til 17 stig, hlýjast A-til.

Fréttin hefur verið uppfærð.