Joe Jackson er látinn

Joe Jackson, faðir tónlistarmannanna Michael og Janet Jackson, er látinn, 89 ára að aldri. Hann var umboðsmaður barna sinna sem flest lögðu tónlistina fyrir sig.

Jackson andaðist snemma í morgun eftir að hafa verið fluttur á sjúkrahús um helgina. Hann glímdi við krabbamein í brisi.

Jackson gegndi mikilvægi lykilhlutverki þegar kom að tónlistarferli bræðranna í The Jackson 5, sem og sólóferli þeirra Michael og Janet Jackson.

Fimm synir Jackson – Jackie, Tito, Jermaine, Marlon og Michael – mynduðu sveitina Jackson 5 árið 1964, en yngri bróðir þeirra Randy bættist síðar meir af og til í hópinn.

Dætur Jackson, þær LaToya, Rebbie og Janet, áttu sömuleiðis farsæla sólóferla og gegndi Joe Jackson hlutverki umboðsmanns þeirra allra.

Í frétt BBC kemur fram að Jackson hafi átt stóran þátt í velgengni barna sinna á sviði tónlistar, en oft var rætt um að hann hafi reynst börnum sínum það strangur að það jaðraði við harðræði.

Jackson fæddist í Fountain Hill í Arkansas árið 1928 og var hann elstur fimm systkina. Á sínum yngri árum gerði hann sér vonir um að gerast hnefaleikamaður og spilaði gítar í blússveitinni Falcons.

Árið 1949 gekk hann að eiga Katherine Scruse og eignuðust þau alls tíu börn saman. Þá átti hann dóttur með Cheryl Terrell.