Þrennt handtekið vegna vopna- og vímuefnabrota

Tveir karlmenn og ein kona voru handtekin um klukkan 22 í gærkvöldi. Að sögn lögreglu eru þau grunuð um margvísleg brot. Til að mynda er konan sögð hafa ekið bifreið undir áhrifum vímuefna, sem og að hafa haft fíkniefni í fórum sínum.

Að sama skapi segir í skeyti lögreglunnar að fíkniefni hafi fundist í fórum mannanna tveggja. Þeir eru jafnframt grunaðir um eignaspjöll og brot á vopnalögum, en annar þeirra er sagður hafa verið með eggvopn á sér. Þau voru öll vistuð í fangageymslu í nótt - „þar til hægt verður að yfirheyra þau.“

Þá voru tveir ökumenn stöðvaðir á höfuðborgarsvæðinu í nótt vegna gruns um akstur þeirra undir áhrifum vímuefna. Þeir voru báðir látnir lausir að lokinni skýrslu- og sýnatöku.