Hviður víða farið yfir 35 metra á sekúndu

Veðrið sem gengið hefur yfir Norðaustur- og Austurland í nótt og í morgun er heldur haustlegt segir Birta Líf Kristinsdóttir, veðurfræðingur á Veðurstofu Íslands.

Stormviðvörun hefur verið í gildi frá því í nótt en henni verður aflétt um klukkan tvö víðast hvar þar sem kröpp lægð norður af Melrakkasléttu og Langanesi fjarlægist nú landið.

Veðrið hefur því náð hámarki sínu að sögn Birtu og dregur nú úr vindi jafnt og þétt.

Hviður hafa víða farið yfir 35 metra á sekúndu. Á Hófaskarði mældist hviða upp á 43 metra á sekúndu, á Eyjabökkum og Gagnheiði hafa hviður farið í allt að 40 metra á sekúndu, á Hallormsstaðahálsi upp í 38 metra á sekúndu og á Möðrudalsöræfum upp í 37 metra á sekúndu.

Birta segir að svona veður sé ekki algengt á þessum árstíma.

„Það er það ekki. Það má eiginlega segja að upp úr sumardeginum fyrsta þá fari nú að slaka á veðrakerfunum hjá okkur, þar á meðal vindinum. Það er frekar að maður myndi búast við mikilli úrkomu heldur en svona miklum vindi yfir sumarið. En þetta getur að sjálfsögðu alltaf gerst, við erum alltaf að fá lægðir á okkur annars slagið allt árið.“

Hún segir ekki lægðir eins og þessa í kortunum á næstunni.

„Næstu daga eru suðlægar áttir, einhver rigning eða skúrir sunnan- og vestanlands en norðaustan til á að vera nokkuð þurrt og jafnvel bjart í vikunni og mun hægari vindur. Þannig að við erum ekki að sjá neitt í líkingu við þetta á næstunni,“ segir Birta.

 

En er ekkert að koma sumar hérna í Reykjavík?

„Það er mjög góð spurning,“ segir Birta hlæjandi og bætir við:

„Það er allavega ekki útlit fyrir 20 stiga hita og sól á næstunni.“