Alveg sama um skoðanir Messi á spilamennsku íslenska liðsins

Alfreð Finnbogason, sóknarmaður Íslands og eini markaskorari okkar á HM í sögunni, segir lið þurfa að nota styrkleika sína hverju sinni, sem séu ólíkir á milli liða. Hann var spurður út í gagnrýni þess efnis að Ísland spilaði leiðinlegan fótbolta.

„Það er engin ein rétt leið til að spila fótbolta. Það eru margar leiðir til að ná árangri,“ sagði Alfreð. Þótt ýmsir fjölmiðlamenn hafi gagngrýnt spilamennsku Íslands er landsliðið að fanga hug og hjörtu fólks víða um heim.

Rússneskir stuðningsmenn eru margir hverjir stuðningsmenn Íslands og sömuleiðis fótboltaáhugamenn á Ítalíu. Þá má ætla að stór hluti kvenna í Argentínu haldi með Íslandi ef marka má fylgjendafjölda Rúriks Gíslasonar á Instagram. Í hnotskurn, íslenska liðið hefur fangað hjörtu fólks um allan heim.

Lionel Messi var ekki hrifin af spilamennsku íslenska liðsins, sagði liðið ekki hafa viljað spila fótbolta. Messi, sem tókst ekki að skora úr vítaspyrnu í leiknum, Hann sagði þó Argentínu þurfa að bæta leik sinn mikið, og hann tók ábyrgð á því að hafa klúðrað vítinu

„Við hefðum getað spilað sóknarbolta og hann hefði unnið 5-0,“ sagði Alfreð.

„En við höfum okkar leikstíl sem hefur skilað okkur árangri.“

Íslenska liðið er svo sem ekki fyrsta liðið í sögunni til að vera gagnrýnt fyrir skemmtanagildi fótboltans. Má nefna Chelsea lið Jose Mourinho sem dæmi og sömuleiðis gríska landsliðið sem fór alla leið á EM 2004. Þótti mörgum spilamennskan hrottalega leiðinlegt en ekki heyrðist neinn kvarta í Grikklandi þegar þeir lyftu titlinum í lok móts.

„Fólk getur haft sínar skoðanir á því en okkur er í rauninni alveg sama,“ sagði Alfreð. 

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.