Sumar stóru félagsskiptanna í íslenska körfuboltanum

Fjórir toppleikmenn í Domino´s deild karla í körfubolta hafa farið á milli liða í deildinni í sumar þar af þrír þeirra til liðs sem þeir mættu í úrslitakeppninni síðasta vor.

Leikmennirnir fjórir eru Brynjar Þór Björnsson, Dagur Kár Jónsson, Danero Axel Thomas og Sigtryggur Arnar Björnsson. Sigtryggur Arnar var sá síðasti af þeim til að fara á milli liða þegar hann fékk sig lausann frá Tindastól og samdi við Grindvíkinga.

Dagur Kár, Danero og Arnar voru allir á topp tíu í framlagi íslenskra leikmanna í úrslitakeppninni á síðustu leiktíð og Brynjar Þór var fyrirliði fimmfaldra Íslandsmeistara KR.

Til viðbótar hafa líka þrír aðrir öflugir leikmenn farið á milli liða í deildinni. Miðherjinn Ragnar Ágúst Nathanaelsson fór frá Njarðvík í Val, framherjinn Ólafur Helgi Jónsson fór frá Þór Þorlákshöfn í Njarðvík og framherjinn Kristinn Marinósson fór frá ÍR í Hauka.

Vísir ætlar nú að skoða aðeins þessa fjóru stærstu sem hafa farið á milli félaga á þessu viðburðarríka sumri í íslenska körfuboltanum.

Sigtryggur Arnar Björnsson

25 ára bakvörður

Gamla liðið: Tindastóll

Nýja liðið: Grindavík

- Hjálpaði Tindastól að slá Grindavík út úr úrslitakeppinni

Meðaltölin á öllu Íslandsmótinu 2017-18 (deild+úrslitak.)

19,4 stig í leik

4,0 fráköst í leik

3,3 stoðsendingar í leik

7. sæti í framlagi Íslendinga í deildinni (17,3 í leik)

10. sæti í framlagi Íslendinga í úrslitakeppninni (16,5 í leik)

Átti frábært fyrsta tímabil með Tindastóls og fáir bjuggust við öðru en að hann yrði áfram hjá liðinu. Ekkert varð hinsvegar að því og Arnar spilar með sínu þriðja liði á þremur árum. Fór auðveldlega úr því að vera besti maðurinn í einu lélegasta liði deildarinnar í að vera besti maðurinn í einu besta liði deildarinnar.

Brynjar Þór Björnsson

30 ára bakvörður

Gamla liðið: KR

Nýja liðið: Tindastóll

- Lyfti Íslandsbikarnum fimmta árið í röð eftir sigur á Tindastól í lokaúrslitum

Meðaltölin á öllu Íslandsmótinu 2017-18 (deild+úrslitak.)

12,5 stig í leik

3,0 fráköst í leik

2,5 stoðsendingar í leik

33. sæti í framlagi Íslendinga í deildinni (10,4 í leik)

19. sæti í framlagi Íslendinga í úrslitakeppninni (10,8 í leik)

Meiddist skömmu fyrir úrslitakeppni en kom til baka og fór fyrir frábærum endaspretti KR-liðsins. Skoraði 31 stig og 7 þrista í tveimur síðustu leikjum KR á móti Tindastól í úrslitaeinvíginu. Leikjhæsti og stigahæsti KR-ingur sögunnar.

Danero Axel Thomas

32 ára framherji

Gamla liðið: ÍR

Nýja liðið: Tindastóll

- Átti frábært einvígi með ÍR á móti Tindastól í undanúrslitum úrslitakeppninnar

Meðaltölin á öllu Íslandsmótinu 2017-18 (deild+úrslitak.)

16,1 stig í leik

6,5 fráköst í leik

2,7 stoðsendingar í leik

16. sæti í framlagi Íslendinga í deildinni (14,7 í leik)

4. sæti í framlagi Íslendinga í úrslitakeppninni (21,0 í leik)

Átti frábært tímabil með ÍR-liðinu og sýndi síðan að hann gat tekið að sér stærra hlutverk í forföllum Ryan Taylor. Danero var með 28,3 stig, 13 fráköst og 34 framlagsstig að meðaltali í leikjunum þremur þar sem Ryan var í leikbanni. Stólarnir fengu að kynnast þessum Danero frá fyrstu hendi og buðu honum samning.

Dagur Kár Jónsson

23 ára bakvörður

Gamla liðið: Grindavík

Nýja liðið: Stjarnan

- Snýr aftur til baka til uppeldisfélagsins síns

Meðaltölin á öllu Íslandsmótinu 2017-18 (deild+úrslitak.)

16,6 stig í leik

3,5 fráköst í leik

6,7 stoðsendingar í leik

14. sæti í framlagi Íslendinga í deildinni (14,7 í leik)

5. sæti í framlagi Íslendinga í úrslitakeppninni (19,7 í leik)

Kominn aftur heim í Garðabæinn eftir þriggja ára fjarveru í Bandaríkjunum og Grindavík. Fékk á sig mikla ábyrgð í Grindavíkurliðinu á síðasta tímabili og bætti sig sem leikmaður frá tímabilinu á undan. Orðinn mjög öflugur leikstjórnandi sem fær nú tækifæri til að stýra sóknarleiknum hjá sínu uppeldisfélagi.