Forsíður ensku blaðanna: Loksins, loksins!

Mikil gleði ríkir í Englandi í kjölfarið af góðu gengi enska karlalalandsliðsins sem er komið í 8-liða úrslit á HM í Rússlandi eftir sigur á Kólumbíu í vítakeppni í gær.

Ensku dagblöðin eru vitanlega uppfull af umfjöllun um leik gærdagsins og hirða ensku hetjurnar allar forsíður dagsins.

Flestar forsíðurnar gera mikið úr því að loksins hafi England unnið vítaspyrnukeppni en þetta var í fyrsta skipti í sögu HM sem England vinnur vítaspyrnukeppni og í fyrsta sinn í 22 ár sem England vinnur vítaspyrnukeppni á stórmóti en liðið vann vítakeppni á EM 1996.

Aukinheldur hefur Englandi gengið afleitlega í útsláttarkeppnum stórmóta undanfarin ár en þetta var fyrsti sigur liðsins í útsláttarkeppni í tólf ár.

Enskum fjölmiðlum hefur gjarnan verið legið á hálsi fyrir gagnrýna og oft á tíðum ósanngjarna umfjöllun um enska liðið en eins og sjá má á myndum sem fylgja þessari frétt ríkir nú mikil gleði á Englandi.