Hamilton gerði nýjan 11 milljarða samning við Mercedes

Heimsmeistarinn Lewis Hamilton verður áfram í liði Mercedes í Formúlu 1 næstu ár. Hann skrifaði í dag undir 80 milljón punda samning við þýska liðið.

Hamilton sigraði í stigakeppni ökuþóra í Formúlunni í fyrra og er því ríkjandi heimsmeistari. Hann hefur ekið fyrir Mercedes í fimm ár, síðan 2013. Nýi samningurinn er til tveggja ára, til 2020, og segja heimildir BBC Sport að Hamilton muni fá 30 milljónir punda á ári, með möguleika á allt að 10 milljónum til viðbóta í bónusgreiðslur, samkvæmt nýja samningnum. Hann gæti því fengið samtals 80 milljónir punda (rúma 11 milljarða króna) fyrir næstu tvö ár.

„Það var gott að klára loks að skrifa undir og tilkynna þetta til þess að geta haldið áfram vinnu. Ég hef aldrei verið ánægðari innan liðs heldur en núna. Við erum á sömu bylgjulengd innan sem utan brautarinnar og ég er sannfærður um það að Mercedes er rétti staðurinn fyrir mig næstu ár,“ sagði Bretinn Hamilton.

Mercedes hefur verið sigursælasta lið Formúlu 1 undanfarin ár og unnið bæði stigakeppni ökuþóra og bílasmiða síðustu fjögur ár. Hamilton á þrjá af þeim heimsmeistaratitlum, Þjóðverjinn Nico Rosberg vann einn.

Hamilton er í dag átta stigum á eftir Sebastian Vettel á Ferrari í stigakeppni ökuþóra. Hann getur komist aftur á toppinn um helgina þegar þýski kappaksturinn fer fram.

Síðasta æfingin í Þýskalandi, tímatakan og sjálfur kappaksturinn verða í beinni útsendingu á Stöð 2 Sport um helgina.