Hamilton: Hungraðari en nokkru sinni fyrr

Lewis Hamilton, ökuþór Mercedes og heimsmeistari í Formúlu 1, er búinn að skrifa undir nýjan samning við Mercedes-liðið og mun aka fyrir það næstu tvö tímabilin eða til ársins 2020.

Þessi 33 ára gamli Breti sem varð heimsmeistari í fjórða sinn á síðasta ári fær 30 milljónir punda eða 4,1 milljarða króna í grunnlaun á ári fyrir næstu tvö tímabil

Með bónusum hækka árslaunin upp í 40 milljónir punda á ári eða 5,5 milljarða króna. Hamilton hefur það gott og mun hafa það enn betra á næstu misserum eins og fjallað var um í gær.

Hamilton ók fyrir McLaren frá 2007-2012 og varð heimsmeistari árið 2008. Hann gekk í raðir Mercedes árið 2013 og hefur orðið heimsmeistari þrívegis síðan þá.

Hann er sem stendur í öðru sæti í heimsmeistarakeppni ökuþóra á eftir Sebastian Vettel hjá Ferrari en aðeins munar átta stigum á köppunum þegar að helmingur keppnistímabilsins er eftir.

„Það er gott að stinga penna við blað og klára þetta. Ég hef verið hluti af Mercedes-fjölskyldunni í 20 ár og mér hefur aldrei liðið betur en núna,“ segir Lewis Hamilton.

„Það var gott að klára loks að skrifa undir og tilkynna þetta til þess að geta haldið áfram vinnu. Ég hef aldrei verið ánægðari innan liðs heldur en núna,“ segir Hamilton.

„Við erum á sömu bylgjulengd innan sem utan brautarinnar og ég er sannfærður um það að Mercedes er rétti staðurinn fyrir mig næstu ár.“

Mercedes-liðið hefur drottnað yfir Formúlunni eftir að Turbo hybrid-vélarnar voru innleiddar árið 2014 en Mercedes er búið að vinna keppni bílasmiða fjórum sinnum í röð.

„Þrátt fyrir alla velgengnina síðan 2013 er Mercedes hungraðari en nokkru sinni fyrr,“ segir hann. „Þessi keppnismennska og ástríða er eitthvað sem ríkir í öllum starfsmönnum liðsins. Það eru allir að reyna að verða betri á hverjum degi,“ segir Lewis Hamilton.

Bretinn verður næst í eldlínunni um helgina þegar að Formúlan snýr aftur úr sumarfríi. Næst á dagskrá er Þýskalandskappaksturinn í Hockenheim sem verður vitaskuld í beinni útsendingu á Stöð 2 Sport.