Býst ekki við nýjum tillögum á aukafundi vegna stöðu heimilislausra

Heiða Björg Hilmisdóttir, borgarfulltrúi Samfylkingarinnar, hafnar ásökunum fulltrúa minnihlutans um meirihlutaflokkarnir hefðu ekkert aðhafst til að bæta stöðu heimilislausra. Mikið átak sé þegar hafið til að takast á við vandann. Þá gerir Heiða Björg ekki ráð fyrir því að neitt nýtt komi fram á aukafundi um heimilislausa í borginni sem nú stendur yfir.

„Það hafa ekki verið lagðar fram neinar fjármagnaðar tillögur, ekki fyrir fundinn í það minnsta. Þetta eru aðallega frekar gamlar tillögur sem hafa verið á sveimi og eru lagðar fram á ný og verða ræddar núna,“ segir Heiða Björg í samtali við fréttastofu. Áætlun um húsnæði fyrir heimilislaust fólk sé í fullri vinnslu.

Fulltrúar minnihlutans í borgarstjórn fóru þess á leit við meirihlutann að blásið yrði til aukafundar í borgarráði vegna neyðarástands sem ríkti í málaflokknum.  Í yfirlýsingu sem fulltrúar minnihlutans sendu frá sér á föstudag er meirihlutinn sakaður um „algjört aðgerðarleysi“.  Það sé ábyrgðarlaust að borgarstjórn og fagráð tækju sér í sumarleyfi á meðan ástandið væri svona. Heimilislaust fólk fái ekki sumarfrí frá áhyggjum sínum.

Meirihlutinn hafi ráðist í ýmis úrræði til handa heimilislausum

Heiða Björg segir að gamli meirihlutinn í borgarstjórn hafi í fyrra brugðist við ástandinu með því að kaupa fjölda íbúða en bætir við að líklega þyrfti að kaupa fleiri.

„Við höfum auðvitað á undanförnum árum verið að gera ýmislegt. Við opnuðum nýtt neyðarskýli, gerðum samning við Barka-samtökin, höfum verið að færa okkur meira í skaðaminnkandi þjónustu, opnuðum úrræði sem við köllum „Húsnæði fyrst“ eða „Housing first“ fyrir tveimur árum og það hefur reynst vel þannig að við ákváðum í desember að fjölga þeim húsnæðisúrræðum þannig að það er ýmislegt sem hefur verið gert og margt sem þarf að gera,“ segir Heiða Björg.

Hún segir að fulltrúar minnihlutans leggi fram margar ágætis tillögur en að það sé ekkert nýtt í þeim. Annars vegar sé verið að leggja fram tillögur sem séu í vinnslu og hins var gamlar tillögur sem lagðar eru fram á ný.

„Þetta er ný borgarstjórn og kannski ekkert óeðlilegt að það þurfi sérstaka fundi til þess að fara yfir það með nýjum borgarfulltrúum hvað hefur verið gert og hvað er í bígerð og kannski koma þau með einhverjar hugmyndir sem hægt er að nýta og ég vona að við getum sammælst um að gera eitthvað róttækt og gott í þessum málum en þá þarf auðvitað að koma til ríkið með sinn þátt sem er þá heilbrigðisþjónustan og stuðningur við þá sem þurfa.“

Vilja koma upp hjólhýsa-og húsbílabyggð

Kolbrún Baldursdóttir, borgarfulltrúi Flokks fólksins, segir í samtali við Fréttablaðið  að önnur tillagan lúti að því að koma upp hjólhýsa-og húsbílabyggð en hin að því að íbúðir sem ekki séu í notkun verði leigðar út ódýrt.

Hún segir að ófremdarástand ríki í málaflokknum enda sé félagslega íbúðakerfið í molum og biðlistar langir.

 

Fleiri heimilislausir

Aðspurð hvort vandi heimilislausra hafi breyst á undanförnum árum svarar Heiða Björg því til að tölur sýni að heimilislausum fjölgar í Reykjavík. Það sé þróun sem sjáist einnig í Evrópu. „Helstu ástæður þess að fólk er heimilislaust er áfengis og/eða fíkniefnaneysla og geðsjúkdómar. Þetta er auðvitað heilbrigðisvandi sem þarf að nálgast,“ segir Heiða Björg sem bendir á að taka þurfi á þessum vanda á forsendum heimilislausra og með virðingum fyrir lífi þeirra og ákvörðunum.

Heiða Björg segir að velferðarráð verði með fund 10. ágúst þar sem farið verður vandlega yfir málaflokkinn með hagsmunaaðilum og notendum þjónustunnar. „Þar er kannski rétti vettvangurinn til að fara yfir það hvaða leiðir akkúrat eru brýnastar núna, hvaða húsnæði það er og hvers lags þjónusta það er sem við þurfum að bæta akkúrat á þessari stundu.“