Biðlar til garðeigenda að klippa runna til að tryggja öryggi

Lögreglan á Vestfjörðum biðlar til garðeigenda að klippa runna sem vaxið hafa út fyrir lóðamörk og skyggja á útsýni ökumanna og gangandi vegfarenda.

Þetta kom fram í stöðuuppfærslu á Facebook síðu Lögreglunnar á Vestfjörðum.

Þar kemur fram að sums staðar sé gróður orðinn það mikill að gangandi vegfarendur og fólk með barnavagna þurfi að fara af gangstéttum og út á götu.

Garðeigendur átta sig ekki allir á því að bannað er að láta trjágróður og runna vaxa út fyrir lóðamörk og þá tryggir það umferðaröryggi að ganga í sumarverkin.