Aldrei færri skráðir í ensku biskupakirkjuna

Aðeins fjórtán prósent Breta telja sig tilheyra ensku biskupakirkjunni ef marka má nýja skoðanakönnun og hafa þeir aldrei verið færri. Fyrir fimmtán árum sögðust 31% vera meðlimir kirkjunnar. Um helmingur segist nú ekki aðhyllast nein trúarbrögð.

Samkvæmt niðurstöðum Bresku samfélagskönnunarinnar (e. British Social Attitudes survey) telur aðeins eitt af hverjum tuttugu ungmennum í landinu sig vera trúað, að því er segir í frétt Reuters-fréttastofunnar. Um 70% af fólki á aldrinum 18-24 ára segjast ekki trúuð.

Mest hefur fækkað í hópi fólks á aldrinum 45 til 54 ára í kirkjunni. Fjöldi meðlima í kaþólsku kirkjunni, öðrum kristnum trúfélögum og öðrum trúarsöfnuðum hefur hins vegar nokkurn veginn staðið í stað.