Sonja Ýr stefnir á formanninn

Sonja Ýr Þorbergsdóttir, lögfræðingur BSRB, gefur kost á sér til formennsku á þingi bandalagsins sem fram fer í október. Elín Björg Jónsdóttir, sem verið hefur formaður BSRB undanfarin níu ár, tilkynnti stjórn í júní að hún hygðist stíga til hliðar á fyrrnefndu þingi.

Sonja staðfestir framboð sitt á Vísi en kosið verður á þinginu sem fram fer 17. til 19. október. Sonja hefur starfað sem lögfræðingur bandalagsins síðastliðinn áratug og segist í starfi sínu hafa unnið ötullega að fjölmörgum af stærstu stefnumálum BSRB.

Hún segir mikilvægasta verkefni BSRB að auka velferð allra, stuðla að auknu jafnrétti og tryggja að allir geti lifað á launum sínum.

Sonja sendi Vísi tilkynningu vegna framboðs síns og má sjá hana í heild hér að neðan.

„BSRB hefur í áratugi barist fyrir lífsgæðum og hagsmunum launafólks og náð miklum árangri í þeirri baráttu. Þrátt fyrir að undanfarin ár hafi ríkt góðæri á landinu hefur það ekki skilað sér með sama hætti til allra og síst til þeirra tekjulægstu. Mikilvægasta verkefni bandalagsins er að auka velferð okkar allra, stuðla að auknu jafnrétti og tryggja það að allir geti lifað á launum sínum.

Eitt af stærstu baráttumálum okkar í BSRB er stytting vinnuvikunnar. Allt of víða einkennist starfsumhverfi í almannaþjónustu af lágmarksmönnun og miklu álagi með tilheyrandi afleiðingum fyrir heilsu fólks. Stytting vinnuvikunnar stuðlar meðal annars að betri líðan, minni streitu, aukinni starfsánægju og fækkun veikindadaga. Við í BSRB þurfum að halda áfram að berjast kröftuglega fyrir styttingu vinnuvikunnar og betra starfsumhverfi.

BSRB hefur ávallt unnið að því að tryggja aðgengi félagsmanna að menntun og með nýjum áskorunum verður þetta hlutverk bandalagsins enn mikilvægara. Hraðar tæknibreytingar munu hafa mikil áhrif á vinnumarkað framtíðarinnar. Störf munu breytast og kalla á nýja færni. Við í BSRB þurfum að bregðast við þessum áskorunum og tryggja að félagsmenn hafi ávallt tækifæri til að bæta við sig þekkingu og færni.*

Við sem erum félagar í aðildarfélögum BSRB erum fjölbreyttur hópur og það er forgangsverkefni bandalagsins að stuðla að því að raddir okkar allra fái að heyrast. Samfélag okkar verður fjölbreyttara með hverju árinu sem líður og fjölmörg tækifæri felast í þessari þróun. Samstaðan hefur skilað okkur mörgum sigrunum og nýjar raddir gera okkur sterkari í baráttunni.

Síðastliðin tíu ár hef ég starfað sem lögfræðingur BSRB og unnið ötullega að því að framfylgja stefnumálum bandalagsins. Ég lýsi því nú yfir að ég gef kost á mér í embætti formanns BSRB á þingi bandalagsins sem haldið verður í Reykjavík 17.–19. október næstkomandi.

Ef ég hlýt kosningu sem formaður BSRB mun ég starfa af krafti að hagsmunum félagsmanna. Við í bandalaginu þurfum að vinna að aðgerðum í húsnæðismálum, efla stuðning við barnafjölskyldur, minnka skattbyrði og tryggja jafnt aðgengi að heilbrigðisþjónustu. Sköpum saman velsæld og jafnrétti fyrir okkur öll.“