Haustveiðin oft ágæt í Ytri Rangá

Veiðin í Rangánum heldur áfram vel inní október en það veiðist oft ágætlega á þessum tíma.

Heildarveiðin í Rangánum var 3.445 laxar þegar tölur voru gerðar upp síðasta miðvikudag en von er á nýjum veiðitölum úr laxveiðiánum í dag og verður uppfærslan birt sem endranær inná www.angling.is.  Veiðin síðustu daga hefur verið ágæt í Ytri Rangá en á mánudaginn komu 24 laxar á land og í gær veiddust 34 laxar sem er fín veiði í alla staði miðað við árstíma.  Það virðist vera töluvert af laxi á nokkrum veiðistöðum en þó minna en var í fyrra enda sést það á heildarveiðinni en það munar um helming á veiddum löxum það sem af er tímabili og heildarveiðinni í fyrra en það ár var eins og unnendur Ytri Rangár muna eftir gott veiðisumar í ánni þó það hafi ekki verið það besta sem áin hefur sýnt.  Haldi áin þessum takti sem hún er í núna út veiðitímann er ekki loku fyrir það skotið að hún geti skorað vel yfir 4.000 laxa svo við vonum að veður haldist gott fram að því.