Samgöngumálin verði tekin til endurskoðunar

Aðalfundur Samtaka um bíllausan lífsstíl hvetur ríkisstjórnina til að endurskoða áherslur sínar í samgöngumálum. Þetta kemur fram í ályktun um aðgerðaáætlun ríkisstjórnarinnar í loftslagsmálum.

„Orkuskipti eru jákvæð á sinn hátt en leysa ekki nema örlítinn hluta af þeim vandamálum sem breyttar ferðavenjur geta leyst,“ segir í ályktuninni. Eftir orkuskipti þurfi enn að leysa þau vandamál sem bílaumferð skapar. Mun skilvirkara sé að fjárfesta í samgöngumannvirkjum sem nýtist gangandi, hjólandi og almenningssamgöngum, þar sem Borgarlína gegni lykilhlutverki.

Þá hvetja samtökin ríkisstjórnina til að klára áætlun um eflingu almenningssamgangna strax á þessu ári og setja aukið fjármagn í verkefnið í byrjun næsta árs.

Í aukaályktun fagnar aðalfundurinn ákvörðun borgarstjórnar um göngugötur allt árið um kring.