Haukur Páll: Ástæðan fyrir því að maður er í þessu

Fyrirliði Valsmanna átti erfitt með að koma orðunum frá sér þegar Valur fagnaði öðrum Íslandsmeistaratitli sínum í röð á Hlíðarenda í dag. Valur vann öruggan sigur á Keflavík 4-1 í lokaumferðinni sem tryggði titilinn.

„Þetta er geggjað, þetta er æðislegt. Þetta er ástæðan af hverju maður er í þessu,“ sagði Haukur Páll Sigurðsson eftir leikinn í dag.

Fyrirliðinn fékk smá högg snemma leiks og þurfti aðhlynningu en það stóð aldrei til að fara út af.

„Maður er vanur að fá högg hér og þar og kannski gefa þau nokkur líka. Það var engin spurning að fara útaf í þessum leik.“

Valsmenn styrktu sig vel í vetur, fengu til dæmis landsliðsmanninn Birki Má Sævarsson heim, og var spáð öruggum sigri af flestum spekingum fyrir mót. Er þetta lið betra en það sem vann titilinn í fyrra?

„Bæði þessi lið eru frábær,“ sagði Haukur Páll.