Hvassviðri, rigning og „snúnari“ lægð væntanleg á morgun

Skil lægðar eru nú á leið yfir landið og á eftir kemur allhvasst eða hvasst skúraveður, að því er fram kemur í hugleiðingum veðurfræðings á vef Veðurstofu Íslands. Lægð dagsins í dag mun halda sig nálægt Grænlandi á leið sinni norðureftir en lægð morgundagsins verður „öllu snúnari“, líkt og veðurfræðingur kemst að orði.

Síðarnefnda lægðin kemur upp að Reykjanesinu snemma í fyrramálið með hvassan vind og talsverða rigningu að auki. Einna hvassast verður sunnan lægðarmiðjunar, sem og mesta úrkoman. Búist er við því að versta veðrið verði á Suður- og Suðausturland í fyrramálið. Þó ber að athuga að spáin gæti breyst ef breytingar verða á landgöngu lægðarinnar.

Þá er íbúum höfuðborgarsvæðisins bent á að hreinsa frá niðurföllum og minnka þannig hættu á vatnsskemmdum, þar sem gert er ráð fyrir mikilli rigningu á höfuðborgarsvæðinu um tíma í fyrramálið.

Veðurhorfur á landinu næstu daga:



Á þriðjudag:

Suðvestan 13-18 m/s með úrhellisrigningu, en mun hægari og úrkomuminna nyrðra. Hiti 6 til 11 stig. Lægir mikið með kvöldinu og dregur úr vætu S- og V-til.

Á miðvikudag:

Norðvestlæg átt, 5-10 m/s með skúrum eða slydduéljum N- og A-lands, en annars hægari vestlæg átt og skýjað með köflum. Hiti 1 til 7 stig, mildast syðst.

Á fimmtudag:

Vestlæg átt og skúrir eða slydduél, en bjartviðri eystra. Hiti 1 til 6 stig.

Á föstudag:

Suðvestanhvassviðri með rigningu og hlýnandi veðri, en lengst af þurrt eystra.

Á laugardag:

Útlit fyrir vestlæga með skúrum eða slydduéljum, en norðlægari með éljum og kólnandi veðri seinnipartinn, einkum norðantil.

Á sunnudag:

Líkur á vaxandi suðvestanátt með vætu og hlýnandi veðri þegar líður á daginn.