Isabella ekki meira með Blikum

Isabella Ósk Sigurðardóttir mun líklega ekki spila meira með Breiðabliki í Domino's deild kvenna vegna krossbandaslita.

Blikar sendu frá sér tilkynningu í dag þar sem þeir segja frá því að Isabella hafi slitið krossband á æfingu á dögunum.

Þetta er mikið áfall fyrir Blika, sem enn hafa ekki unnið leik í Domino's deildinni, því Isabella er lykilmaður í liðinu og var framlagshæst í deildinni áður en hún meiddist.

Isabella mun fara í aðgerð eins fljótt og hægt er.

„Við sendum Isabellu baráttu- og batakveðjur í ferlinu sem nú tekur við hjá henni og hlökkum til að sjá hana aftur á parketinu sem allra fyrst,“ segir í tilkynningu Breiðabliks.