Vegum lokað á Kjalarnesi, Öxi, Fjaðrarheiði og á Suðausturlandi

Búið er að loka þjóðvegi eitt á Kjalarnesi og á Suðausturlandi, frá Gígjukvísl í Jökulsárlón vegna veðurs. Þá er þjóðvegur sitt einnig lokaður frá Hvolsvelli og austur í Vík.

Óveður er nú víða á landinu þar sem Veðurstofan spáir ofsaroki með norðan- og norðaustanátt, sérstaklega sunnan jökla þar sem verður líka sviptivindasamt.  

„25-30 m/s á hringveginum frá Lómagnúpi austur á Höfn með hámarki í fyrramálið.  Hviður um og yfir 50 m/s. Einnig hviður 40-50 m/s undir Eyjafjöllum og í Mýrdal.  Hviðuveður á Kjalarnesi og undir Hafnarfjalli eftir kl. 20 í kvöld. Eins á sunnanverðu Snæfellsnesi,“ segir í skilaboðum frá Veðurstofunni.

Færð á vegum:

Suðurland: Víðast hvar greiðfært en sumstaðar hálkublettir í innsveitum. Hvasst er á Reynisfjalli og í Mýrdal.

Suðvesturland: Lokað er á Kjalarnesi Það er víðast hvar greiðfært en þó eru hálkublettir á fáeinum útvegum.

Vesturland: Hálka er á Holtavörðuheiði en einnig eru hálkublettir mjög víða og hvasst er á Snæfellsnesi. 

Vestfirðir: Hálkublettir eru á flestum leiðum en hálka er á Steingrímsfjarðarheiði og í Ísafjarðardjúpi eins er hálka á Kleifaheiði og á Raknadalshlíð Hvasst allvíða. Dynjandisheiði og Hrafnseyrarheiði hefur verið lokað vegna versnandi veðurs.

Norðurland:  Hálka er á velflestum vegum. Éljagangur við Eyjafjörð. Hvasst er all víða.

Norðausturland: Víðast hvar er hálka, jafnvel flughálka, en sumstaðar snjóar með ströndinni og þar er snjóþekja.

Austurland: Lokað er um Fjarðarheiði. Víða hálka á fjallvegum og til landsins en hálkublettir eða autt með ströndinni. Þæfingsfærð er á Breiðdalsheiði en þungfært á Mjóafjarðarheiði. Búið er að loka Öxi.

Suðausturland: Vegir eru auðir en sumstaðar nokkuð hvasst og byljótt. Þjóðvegur 1 er lokaður frá Gígjukvísl í Jökulsárlón.

Fréttin hefur verið uppfærð.