Mourinho: Ég lærði ekkert og ekkert kom mér á óvart

José Mourinho, knattspyrnustjóri Manchester United, segir að ekkert hafi komið sér á óvart og að hann lærði ekki neitt af tapinu gegn Valencia í Meistaradeildinni í gærkvöldi.

Mourinho og lærisveinar hans hefðu getað stolið efsta sæti H-riðils af Juventus sem tapaði afar óvænt fyrir Young Boys í Bern, 2-1, en sigur United gegn hálfgerðu varaliði Valencia hefði komið því upp fyrir Tórínóliðið.

Phil Jones skoraði sigurmarkið í eigið net í byrjun seinni hálfleiks þegar að hann kom Valencia í 2-0 en Marcus Rashford minnkaði muninn með góðu skallamarki undir leikslok.

„Ég lærði ekki neitt af þessu og ekkert kom mér á óvart,“ sagði Mourinho fúll við fréttamenn eftir leikinn í gærkvöldi.

Með sigri hefði United komist hjá því að mæta stórveldum í Evrópuboltanum og tryggt því einvígi á móti Atlético, Roma, Schalke, Ajax eða Lyon.

„Það er alltaf afrek að komast upp úr riðlinum. Það er líka góður árangur að ná öðru sæti,“ sagði José Mourinho.