Ísland áratug á eftir Noregi í netverslun

Íslendingar eru að mínu mati tíu árum á eftir Norðmönnum og Dönum í netverslun. Ef haldið er rétt á spöðunum gætum við verið á pari við þá eftir tvö til fjögur ár. Það er nefnilega svo mikið af nýjum leiðum til að vekja athygli á vörum,“ segir Diðrik Örn Gunnarsson, stjórnandi stafrænnar þjónustu hjá MediaCom Íslandi og stundakennari við Háskólann í Reykjavík.

Á undanförnum tólf mánuðum hafa 55 prósent Íslendinga verslað á netinu. Flestir keyptu í erlendum netverslunum, eða 67 prósent svarenda. Þeir sem hafa hærri tekjur og meiri menntun eru líklegri til að versla á netinu. Þetta kemur fram í nýrri könnun Zenter rannsókna með tvö þúsund manna úrtaki, segir Diðrik Örn.

„Til samanburðar versluðu þrír af hverjum fjórum Norðmönnum á netinu á síðasta ári, samkvæmt rannsókn Verslunarráðs Noregs. Þetta ætti að vekja verslunarmenn af værum blundi,“ segir Diðrik Örn.

Hann starfaði í 15 ár erlendis á þessu sviði, sjö ár í Danmörku, átta ár í Noregi og flutti aftur til Íslands árið 2016. Hann segir að netverslun fari vaxandi á Íslandi og bendir á að samkvæmt Þjóðarpúlsi Gallup hafi 43 prósent landsmanna keypt einhverjar jólagjafir á netinu fyrir síðustu jól. Það hafi verið mikil aukning frá fyrri mælingum en þá var hlutfallið einungis um 11-15 prósent.

Hugmyndir að jólagjöfum

„Það er athyglisvert að myndbönd eru að ryðja sér til rúms sem einn vinsælasti miðillinn þegar kemur að því að fá hugmyndir að jólagjöfum. Næstum tveir þriðju Bandaríkjamanna sóttu innblástur með þeim hætti,“ segir Diðrik Örn.

Ef íslensk fyrirtæki vilja keppa í netverslun þurfa þau að innleiða fyrr ýmis kerfi, að hans mati. „Við erum til að mynda aftar á merinni en aðrir í Evrópu í fríðindakerfum og tæknilausnum.

Það eru engu að síður margir sem horfa til netverslunar í auknum mæli. Ég hef unnið með verslunum sem stefna á að loka í verslunarmiðstöð og selja eingöngu á netinu. Þetta eru verslanir með trausta viðskiptavini. Þær hafa því gott bakland og geta dregið úr kostnaði með því að vera einvörðungu á netinu.

Það eru mikil tækifæri fólgin í netverslun vegna þess að 61 prósent manna eru reiðubúnir að kaupa af fyrirtækjum sem þeir hafa ekki verslað við áður,“ segir Diðrik Örn.

Talið berst að mismunandi aðstæðum til að kaupa á netinu erlendis. Hann segir að Danir búi að nálægð við Þýskaland og Bretland. Norðmenn séu að mörgu leyti líkir Íslendingum en landið sé strjálbýlt sem ýti undir netverslun því ýmsir bæir hafi verið einangraðir. Auk þess megi kaupa fyrir allt að fimm þúsund íslenskar krónur tollfrjálst á netinu.

 

Norðmenn versla á netinu því það er ódýrara

„Rannsókn Verslunarráðs Norðmanna leiðir í ljós að 41 prósent Norðmanna verslar á netinu því það er ódýrara, 22 prósent gera það vegna öryggis og 11 prósent telja það skilvirkara. Netverslun er nefnilega fljótleg, þægileg og hagstæð,“ segir Diðrik Örn.

Norðmenn þrefölduðu kaup sín í gegnum netverslun á árunum 2011 til 2017 í erlendri netverslun. Vöxturinn í norskri netverslun var 101 prósent. Á sama tíma nam vöxtur í hefðbundinni verslun 17 prósentum, að hans sögn.

 

Kaupa þarf fyrir 19. desember

Diðrik Örn segir að neytendur og verslunarmenn þurfi að vera meðvitaðir um að kaupa þurfi jólagjafir á netinu af innlendri verslun fyrir 19. desember til að fá þær í hús í tæka tíð fyrir jólin.

„Samkvæmt rannsóknum Google eiga 70 prósent Íslendinga eftir að kaupa jólagjafir síðustu vikuna fyrir jól,“ segir hann.

Konur hugi þó fyrr að jólagjafainnkaupum en karlmenn, ef marka má leit hjá Google undanfarna viku. „58 prósent hafa leitað að jólagjafahugmyndum fyrir karlmenn en 42 prósent að jólagjafahugmyndum fyrir konur. Það verður fróðlegt að sjá hver trónir á toppnum á Þorláksmessu,“ segir hann og efast ekki um að karlmenn verði sveittir við innkaup þá.

Yfirleitt noti fólk síma til að leita að gjöfum. Oftar sé leitað að Kringlunni en Smáralind. Hann segir að einungis 18 prósent Íslendinga hafi keypt jólagjafir á Svörtum föstudegi og Stafrænum mánudegi og því eigi margir eftir að gera sín innkaup.

Athugasemd: Guðmundur Magnason, forstjóri Heimkaup.is, vekur athygli á að þeir sem búi á höfuðborgarsvæðinu geti keypt jólagjafir hjá þeim fyrir hádegi á aðfangadag og fengið þær í hendur skömmu seinna. Þeir sem búi á Suðurlandi og Reykjanesi geti keypt á Þorláksmessu og fengið gjafirnar í tæka tíð. Aðrir yrðu að kaupa helgina fyrir þá helgi. Heimkaup dreifir ekki í gegnum Póstinn heldur er með eigin dreifingu.