Rekstur Smáratívolís þungur alveg frá opnun

Rekstur Smáratívolís hefur verið frekar þungur alveg frá opnun árið 2011 en hefur verið í jafnvægi í ár. Þetta segir Ingólfur Guðmundsson, framkvæmdastjóri Smáratívolís, en tilkynnt var í morgun að tívolíinu yrði lokað í lok febrúar næstkomandi.

„Þetta er kostnaðarsamur rekstur þar sem öryggiskröfur eru miklar. Það var því alltaf þörf á mörgum starfsmönnum,“ segir Ingólfur. Hann segir að gestafjöldinn hafi verið nokkuð jafn á síðustu árum, þó að hann væri ekki með nákvæmar tölur á hreinu.

Ingólfur segir að ákvörðun um lokun hafi verið tekin nú þegar til stendur að gera breytingar á austasta hluta verslunarmiðstöðvarinnar þar sem tívolíið hefur verið til húsa.

Taka yfir hluta húsnæðisins

Smárabíó muni taka yfir hluta húsnæðisins þar sem Smáratívolí hefur verið og bjóða upp á þjónustu fyrir hópa og afmæli sem og afþreyingu á efri hæð hússins. Þá verður rekstur barnagæslu á vegum bíósins.

Hann segir að Sleggjan verði brátt seld og klessubílarnir munu sömuleiðis loka en að bíóið muni áfram starfrækja lasertag-salina. „Tívolíið verður áfram starfandi út febrúar þannig að við látum engan bilbug á okkur finna og fólki gefst enn færi á að fara í tækin.“

Alls hafa um 25 manns starfað hjá Smáratívolí og segir Ingólfur að mörgum verði boðið að starfa áfram hjá Smárabíó.