Segir Björn Bjarnason rógbera og bullara

Viðar Þorsteinsson, framkvæmdastjóri Eflingar, fordæmir skrif Björns Bjarnasonar, fyrrverandi dómsmálaráðherra, og krefst þess að hann dragi þau til baka. Björn, sem rekið hefur vefsíðu sína bjorn.is áratugum saman, hefur birt bréf Viðars en ekki séð ástæðu til að draga neitt í land með yfirlýsingar sínar sem fara svo þversum í Viðar.

Viðar gerir athugasemdir við nokkur atriði í nýjasta pistli Björns svo sem þessi:

„Nokkrar umræður urðu í haust þegar fjármálastjóri Eflingar til margra ára fékk fyrirmæli um að fara í veikindaleyfi eftir að hafa gert athugaemd vegna reiknings frá eiginkonu Gunnars Smára til Eflingar.“

Segir fullyrðingar Björns rógburð

Viðar segir þetta af og frá: „Það er rangt að fjármálastjóri eða nokkur starfsmaður Eflingar hafi „fengið fyrirmæli um að fara í veikindaleyfi.“ Leyfi vegna veikinda, fæðingarorlofs o.s.frv. eru samnings- og lögbundin réttindi sem starfsmenn Eflingar nýta sér að eigin frumkvæði að uppfylltum skilyrðum þegar tilefni er til. Stjórnendur Eflingar reyna að sjálfsögðu ekki að hafa áhrif á það hvenær eða hvernig starfsmenn félagsins nýta sér þau réttindi. Fullyrðingar um slíkt eru rógburður.

Mér er að fullu kunnugt um störf Öldu Lóu Leifsdóttur blaðamanns fyrir Eflingu og hef gert grein fyrir þeim opinberlega. Alda Lóa hefur annast hið glæsilega kynningarverkefni „Fólkið í Eflingu“ sem kynnt var og samþykkt á vettvangi stjórnar Eflingar á síðasta ári. Hvergi hefur komið fram athugasemd frá fjármálastjóra vegna reikninga frá Öldu Lóu, enda með öllu óskiljanlegt á hvaða forsendum fjármálastjóri hefði sett getað fram slíka athugasemd.“

Viðar, sem birtir bréf sitt til Björns á Facebooksíðu sinni, segist hafa hringt í Björn „rétt í þessu og fékk staðfest að hann hefur móttekið erindi mitt, þar sem ég leiðrétti ósannandi hans um starfsemi Eflingar. Björn hefur birt bréf mitt á síðu sinni, en skyldi hann hafa manndóm til að draga rangfærslurnar til baka?“

Maðurinn lifir í valkvæðum veruleika

Björn virðist ekki síst hafa horn í síðu Gunnars Smára Egilssonar, stofnanda Sósíalistaflokks Íslands, en Gunnar Smári segist, á síðu Viðars, ekki nenna að elta ólar við Björn.

„Hann skrifar þarna t.d: „Hann [þ.e. ég, gse] lét t.d. eins og allir helstu skemmtikraftar þjóðarinnar kæmu fram á fjáröflunarhátíð í Háskólabíói sem aldrei var haldin til að bjarga Fréttatímanum.“ Björn er þarna að halda fram að glæsileg samkoma til stuðnings Fréttatímanum (undir slagorðinu: Frjáls fjölmiðlun) hafi ekki farið fram. Maðurinn lifir algjörlega í valkvæðum veruleika, er villtur í eigin órum.“