Tólf að­stoðar­sátta­semjarar skipaðir

Ríkissáttasemjari hefur upplýst hvaða tólf einstaklingar munu aðstoða embættið á yfirstandandi álagstímum. Á níunda tug kjarasamninga losnuðu um áramót og aðrir 152 losna losna í lok mars.

Til þess að aðstoða við úrvinnslu þeirra mála sem komin eru inn á borð embættisins ákvað ríkissáttasemjari að nýta sér heimild í lögum til að fjölga aðstoðarsáttasemjurum. Framvegis mun einn eða fleiri úr þeim hópi vera kallaður til aðstoðar í hverju sáttamáli ásamt ríkissáttasemjara. 

Fram til þessa hefur embættið stuðst við einn slíkan aðstoðarmann, en eftir fjölgunina eru þeir tólf talsins sem fyrr segir. Umræddir einstaklingar eru þó ekki ráðnir til embættisins heldur er um að ræða fólk í öðrum störfum, sem verður ríkissáttasemjara innan handar sem verktakar.

Aðstoðarsáttasemjarar eru eftirfarandi:

 

Aðalsteinn Leifsson                      Framkvæmdastjóri hjá EFTA

Ástráður Haraldsson                     Héraðsdómari

Bergþóra Ingólfsdóttir                  Héraðsdómari

Elín Blöndal                                 Lögfræðingur og markþjálfi

Elísabet S. Ólafsdóttir                   Skrifstofustjóri ríkissáttasemjara

Guðbjörg Jóhannesdóttir              Sóknarprestur og MA í sáttamiðlun

Helga Jónsdóttir                           Lögfræðingur

Ingibjörg Þorsteinsdóttir              Héraðsdómari

Jóhann Ingi Gunnarsson              Sálfræðingur og ráðgjafi

Kristín Ingólfsdóttir                      Fyrrverandi rektor Háskóla Íslands

Magnús Jónsson                          Fyrrverandi Veðurstofustjóri

Þórður S. Gunnarsson                 Lögmaður

Haft er eftir Bryndísi Hlöðversdóttur, ríkissáttasemjara, á vef embættisins að hún hlakki til að vinna með hópnum.

 „Þetta eru öflugir einstaklingar sem hafa mikla reynslu í farteskinu ýmist á sviði sáttamiðlunar, samningatækni, ráðgjafar, vinnuréttar eða stjórnunar sem án efa getur nýst vel við samningaborðið. Hópurinn hefur hist í tvígang og setið námskeið hjá okkur til að undirbúa sig undir verkefnið. Ég tel að einstaklega vel hafi tekist til við að manna þennan hóp,“ segir Bryndís.