Snjókoma og versnandi skyggni

Það munu skil nálgast landið úr suðvestri í dag með vaxandi suðaustan átt, snjókomu og versnandi skyggni að því er segir í hugleiðingum veðurfræðings á vef Veðurstofu Íslands.

Veður fer hlýnandi og sunnan til mun hlána síðdegis með slyddu eða rigningu.

Í kvöld er síðan spáð norðaustan hvassviðri en mun hægari suðvestan átt með slydduéljum um suðvestanvert landið.

Á morgun má svo búast við norðaustan hvassviðri eða stormi norðvestan til á landinu en mun hægari vindi sunnan- og austanlands. Víða él og forst núll til sjö stig.

Veðurhorfur á landinu:

Breytileg átt 5-10 og él á stöku stað. Frost 3 til 14 stig, kaldast inn til landsins. Gengur í austan 10-18 í dag með snjókomu, fyrst suðvestantil og hlýnar. Slydda eða rigning sunnantil síðdegis. Snýst í suðvestan 8-13 með skúrum eða éljum um landið suðvestanvert í kvöld, en annars norðaustan og austan 13-20 og snjókoma, hvassast á annesjum. Norðaustan 15-23 um landið norðvestanvert á morgun, en 5-13 sunnan- og austantil. Víða él og frost 1 til 7 stig, en sums staðar frostlaust við suðurströndina. Norðan 10-18 annað kvöld og kólnar í veðri, él fyrir norðan, en léttir til um landið sunnanvert.

Á þriðjudag:

Austan og norðaustan 8-15 m/s, en 15-20 norðvestantil. Víða snjókoma eða él, en dregur úr vindi og ofankomu um kvöldið. Frost 0 til 9 stig, mildast syðst.

Á miðvikudag:

Norðlæg átt 5-13 og stöku él, en bjartviðri um landið sunnanvert. Frost 3 til 15 stig, kaldast inn til landsins.

Á fimmtudag:

Austlæg eða breytileg átt. Stöku él og talsvert frost norðantil, en snjókoma með köflum sunnantil og frost 0 til 5 stig.