Viðurkenning á góðu starfi

Stjarnan úr Garðabæ var aðsópsmest í Geysisbikarvikunni í körfubolta. Félagið átti fimm lið í úrslitum og fjögur þeirra urðu bikarmeistarar.

Tíundi flokkur Stjörnunnar reið á vaðið þegar þeir urðu bikarmeistarar á föstudaginn eftir sigur á Fjölni, 63-52, í úrslitaleik. Á laugardaginn varð meistaraflokkur karla bikarmeistari í fjórða sinn eftir sigur á Njarðvík, 84-68. Stjarnan tapaði hins vegar fyrir Val, 74-90, í sínum fyrsta úrslitaleik í meistaraflokki kvenna.

Á sunnudaginn urðu svo 9. flokkur drengja og drengjaflokkur Stjörnunnar bikarmeistarar. Stjarnan bar sigurorð af Haukum, 72-54, í úrslitaleik 9. flokks og í úrslitaleiknum í drengjaflokki hafði Stjarnan betur gegn Fjölni, 77-87.

„Ég get alveg tekið undir að þetta sé viðurkenning á því starfi sem hefur verið unnið hjá Stjörnunni síðustu ár,“ sagði Snorri Örn Arnaldsson, þjálfari 9. flokks drengja hjá Stjörnunni, í samtali við Fréttablaðið um bikarhelgina.

Þótt yngri flokka starfið hjá Stjörnunni sé í blóma núna hefur sú ekki alltaf verið raunin. Ekki er langt síðan körfuknattleiksdeildin lagði nánast upp laupana.

„Deildin var formlega stofnuð 1993. Meistaraflokkur karla komst upp í efstu deild tímabilið 2001-02 en tapaði þá öllum leikjunum sínum. Þá var ekki mikið yngri flokka starf í gangi og deildin lagðist næstum því af. En nokkrir eldhugar héldu þessu gangandi. Það þurfti mikið átak til að halda úti meistaraflokki og þeim fáu yngri flokkum sem voru þá,“ sagði Snorri sem var ráðinn yfirþjálfari hjá Stjörnunni 2009. Þá voru iðkendur í körfuknattleiksdeildinni fáir en þeim hefur fjölgað hratt á síðustu árum.

Fjölgað um 300

„Á þeim tíma voru að mig minnir 80 iðkendur í körfuknattleiksdeildinni, að meistaraflokkunum meðtöldum. Mitt hlutverk var að stýra uppganginum og það má segja að ég hafi komið inn á réttum tíma því þá var búið að leggja grunninn. Fimleikahúsið í Ásgarði var tekið í notkun 2010 og þá fékk körfuknattleiksdeildin salinn í Ásgarði fyrir sig. Við lögðum mikla áherslu á að fá áhugasama og góða þjálfara og að það yrði góður fjöldi iðkenda í yngstu flokkunum,“ sagði Snorri. 

Á þessum tíma var meistaraflokkur karla farinn að gera sig gildandi og varð bikarmeistari í fyrsta sinn 2009 og endurtók leikinn 2013. Stjarnan fór einnig í úrslit um Íslandsmeistaratitilinn 2011 og 2013.

„Það var ekki fyrr en um 2012-13 sem við þurftum ekki að leggja elstu flokkana af vegna of fárra iðkenda. Það krafðist mikillar vinnu,“ sagði Snorri sem var yfirþjálfari Stjörnunnar 2009-12 og svo aftur 2013-15. Að hans sögn fór iðkendafjöldinn í yngri flokkum Stjörnunnar síðasta vetur upp í 350 og um 380 að meistaraflokkunum meðtöldum.

„Strákamegin er starfið hjá Stjörnunni það fjölmennasta en við erum enn að berjast við að ná inn nógu mörgum stelpum. Sagan er ekki með okkur kvennamegin en það að hafa átt lið í bikarúrslitum vekur vonandi aukinn áhuga.“

Snorri segir að hæfir þjálfarar hafi skipt miklu fyrir uppganginn í yngri flokka starfi Stjörnunnar.

„Þjálfararnir hafa verið mjög duglegir að vekja áhuga. Í því samhengi má nefna Kjartan Atla Kjartansson sem var lengi með yngstu flokkana. Árni Ragnarsson hefur þjálfað þarna. Síðasta vetur var hann með 63 stráka í 2009-árganginum og þar var kominn biðlisti. Elías Orri Gíslason, Óskar Þór Þorsteinsson og Ragnar Björgvin Tómasson hafa einnig unnið gott starf en þeir eru allir uppaldir hjá félaginu. Þá ber að nefna þátt Barry Timmermanns sem tók við starfi yfirþjálfara 2015,“ sagði Snorri. Hann bindur vonir við að kvennastarfið hjá Stjörnunni muni stækka á næstu árum.

„Meistaraflokkur kvenna var settur á laggirnar 2009 og sama ár var byrjað að byggja starfið í yngri flokkum kvenna. Það hafði ekki verið neitt slíkt og það tók langan tíma að byggja það upp. Fyrsta mánuðinn var ein stelpa að æfa en í lok vetrar voru 30 stelpur farnar að æfa,“ sagði Snorri sem telur að um 80 stelpur séu í yngri flokkum Stjörnunnar.

Áhrif Jóns Kr. og Teits

Snorri segir að ekki megi vanmeta þátt Jóns Kr. Gíslasonar, fyrrverandi landsliðsþjálfara, sem átti stóran þátt í því að ýta körfuboltaskipinu í Garðabæ úr vör. Yngsti sonur hans, Dúi Þór, varð bikarmeistari með meistaraflokki og drengjaflokki um helgina. Sá elsti, Dagur Kár leikur sem atvinnumaður í Austurríki og sá næstelsti, Daði Lár, með Haukum. Þeir léku áður með meistaraflokki Stjörnunnar.

„Jón Kr. hefur komið að því að byggja upp starfið í kringum sína stráka en hann er líka mikill áhugamaður um deildina og er alltaf reiðubúinn að aðstoða og miðla af sinni miklu reynslu. Til dæmis kom formaður körfuknattleiksdeildarinnar [Hilmar Júlíusson] upphaflega inn í starfið í gegnum son sinn [Tómas Þórð] sem Jón Kr. þjálfaði,“ sagði Snorri sem var aðstoðarmaður Teits Örlygssonar með meistaraflokk karla í nokkur ár. Hann segir að þótt Teitur hafi aldrei þjálfað yngri flokka hafi Teitur haft mikil áhrif á starfið hjá Stjörnunni. „Metnaður hans, keppnisskap og þekking á leiknum smitaði út frá sér,“ sagði Snorri.

En hver er framtíðarsýnin hjá körfuknattleiksdeild Stjörnunnar? „Við ætlum að vera með flottasta yngri flokka starfið. Það er huglægur mælikvarði en við viljum vera með marga iðkendur og ná árangri eins og um helgina. En gæði þjálfunar yngri flokka felst í meiru en að vinna titla. Við viljum að það verði horft til okkar sem leiðandi afls í uppbyggingu á yngri flokka starfi. Okkur finnst við vera á réttri leið,“ sagði Snorri að lokum.