James með þrennu fyrir Bayern

Bayern München tók toppsætið í þýsku Bundesligunni af Borussia Dortmund með stórsigri á Mainz í dag.

Robert Lewandowski kom Bayern á bragðið strax á þriðju mínútu leiksins. Eftir hálftíma bætti James Rodriguez öðru marki við og Kingsley Coman kom Bayern í 3-0 fyrir hálfleik.

Á fjögurra mínútna kafla snemma í seinni hálfleik setti Rodriguez tvö mörk og fullkomnaði þar með þrennu sína.

Þá var orðið úti um einhverja von sem Mainz hafði kannski um endurkomu og Alphonso Davies lagði svo lokahnútinn á upprúllun Bayern með marki á 70. mínútu.

Eftir 26 umferðir eru Bayern og Dortmund jöfn að stigum en Bayern er í toppsætinu á markatölu með 41 mark í plús á móti 34 hjá Dortmund.