Wolfsburg í bikarúrslit fimmta árið í röð

Sara Björk Gunnarsdóttir lék allan leikinn þegar Wolfsburg vann stórsigur á Bayern München, 0-4, í undanúrslitum þýsku bikarkeppninnar í dag.

Wolfsburg á því möguleika á að verða bikarmeistari fimmta árið í röð. Í úrslitaleiknum mætir liðið Freiburg sem vann Hoffenheim, 0-2, fyrr í dag.

Pernille Harder skoraði tvívegis fyrir Wolfsburg og Caroline Hansen og Ewa Pajor sitt markið hvor.

Wolfsburg féll úr leik fyrir Lyon í Meistaradeild Evrópu í síðustu viku en var ekki lengi að hrista þau vonbrigði af sér.

Wolfsburg og Bayern eru jöfn að stigum á toppi þýsku úrvalsdeildarinnar þegar fimm umferðum er ólokið.