Alfreð úr leik næstu mánuðina

Landsliðsframherjinn Alfreð Finnbogason verður frá keppni næstu mánuðina. Hann gekkst undir aðgerð á kálfa á fimmtudaginn.

Samkvæmt þýskum miðlum verður Alfreð frá í 3-4 mánuði. Ef satt reynist leikur hann ekki meira með Augsburg á tímabilinu og missir af landsleikjunum gegn Albaníu og Tyrklandi í júní.

Alfreð hefur verið mikið meiddur í vetur og aðeins leikið 18 leiki með Augsburg í þýsku úrvalsdeildinni.

Í þeim hefur hann skorað tíu mörk en hann er markahæsti leikmaður Augsburg á tímabilinu.

Alfreð hefur leikið með Augsburg frá því í febrúar 2016.