Verjandi Hreiðars Más: „Það er nóg komið“

Hörður Felix Harðarson, verjandi Hreiðars Más Sigurðssonar, fyrrverandi forstjóra Kaupþings, segir sýknudóm Héraðsdóms Reykjavíkur í dag í CLN-málinu svokallaða í samræmi við væntingar.

„Dómurinn fer í sjálfu sér mjög einfalda og að mínu viti hárrétta leið, það er að segja hann metur það bara hvort það séu einhver merki þess í málinu að þarna hafi verið einhver auðgunarásetningur af hálfu ákærðu og telur réttilega að það hafi ekki verið og af þeirri ástæðu er sýknað,“ segir Hörður Felix.

Hann vonar að þetta séu hin endanlegu lok málsins en með dómnum í dag voru ákærðu sýknaðir í annað sinn í málinu.

„Fyrst og fremst ánægja og í samræmi við væntingar. Þetta er öðru sinni sem ákærðu eru sýknuð og búið að vísa málinu frá dómi einu sinni að auki þannig að þetta er búið að vera að velkjast um í dómskerfinu í fimm ár,“ segir Hörður Felix spurður út í viðbrögð sín við dómnum.

Það sé þó ekki í hans höndum hvort málinu ljúki nú þar sem ákæruvaldið gæti áfrýjað dómnum til Landsréttar.

„En ég vona að þetta séu hin endanlegu lok málsins. Það er nóg komið, að minnsta kosti hvað tíma varðar og það álag sem ákærðu hafa þurft að þola í þessu máli. Þetta er orðin tíu ára rannsókn og fimm ára dómsmeðferð. Svo er þetta í þriðja sinni sem dómur fellur á þann veg að ákæruvaldið sé ekki með efni í mál,“ segir Hörður Felix.

Þá segist hann jafnframt telja að fólk geri sér ekki almennilega grein fyrir því hvaða álag það er á þá einstaklinga sem eiga í hlut að þurfa að sæta rannsókn sem þessari.

Ríkið greitt á sjötta tug milljóna í málskostnað

Ákæra í CLN-málinu var gefin út árið 2014 og fyrsti dómur í því féll í héraði í janúar 2016. Þá er þetta ekki eina málið sem héraðssaksóknari, áður sérstakur saksóknari, hefur höfðað gegn Hreiðari Má og fleirum fyrrverandi stjórnendum Kaupþings.

Alls hefur Hreiðar Már sætt ákæru í fimm málum. Tveimur hefur lokið með dómum Hæstaréttar, einu með dómi Landsréttar þar sem annað mál er jafnframt undir áfrýjun og svo CLN-málið.  

„Það er nú meginregla í sakamálalögunum að ef það eru mörg atvik til rannsóknar þá er meginreglan sú að það eigi að ákæra í einu lagi til þess að menn eigi ekki að þurfa að þola endurtekna málsmeðferð. Það er ekki gert í þessum hrunmálum og ef ég tek til dæmis umbjóðanda minn þá er hann búinn að sæta ákærum í fimm aðskildum málum og verið samfleytt í slíkum málarekstri í tíu ár. Því miður er því ekki alveg lokið. Þetta er náttúrulega engan veginn boðlegt, ég er búinn að segja það mjög lengi en þetta er staðan,“ segir Hörður Felix.

Þá nefnir hann kostnaðinn við málareksturinn.

„Til dæmis bara með þetta mál, kostnaður þjóðfélagsins af þessu. Eitt eru hagsmunir þessara einstaklinga og fjölskyldna þeirra og svo er það kostnaður þjóðfélagsins. Þú getur tekið bara málskostnaðurinn sem  hefur verið dæmdur í þessu máli einu og sér er hátt á sjötta tug milljóna og þá eru ótaldar allar þær fjárhæðir sem hafa farið í rannsóknina sjálfa.“

Dóminn í heild má lesa hér.