Enski boltinn

Liverpool sagt vera eitt af liðunum á eftir miðjumanni Real Madrid

Óskar Ófeigur Jónsson skrifar
Dani Ceballos vann Evrópumeistaratitil með spænska 21 árs landsliðinu á dögunum.
Dani Ceballos vann Evrópumeistaratitil með spænska 21 árs landsliðinu á dögunum. Getty/Denis Doyle
Þrjú ensk úrvalsdeildarfélög vilja öll fá til síns spænska miðjumanninn Dani Ceballos samkvæmt fréttum frá Spáni.

Spænska stórblaðið Marca segir að Liverpool, Tottenham og Arsenal hafi öll áhuga á hinum 22 ára gamla unglingalandsliðsmanni Spánverja.

Dani Ceballos var valinn í úrvalslið mótsins fyrr í sumar þegar Spánverjar urðu Evrópumeistarar hjá 21 árs landsliðum eftir 2-1 sigur á Þýskalandi í úrslitaleik.





Dani Ceballos fékk aukafrí eftir mótið og fer því ekki með Real Madrid liðinu í keppnisferðalag til Kanada. Marca segir að Real Madrid hafi líka fengið fyrirspurnir um leikmanninn frá Ítalíu og Þýskalandi en að framtíð hans sé í Englandi.

Blaðamaður Marca veltir fyrir sér hvort gott samkomulag á milli Real Madrid og Tottenham hafi hér eitthvað að segja og þá er vitað af áhuga Real á danska miðjumanninum Christian Eriksen.

Dani Ceballos þykir líka henta leikstíl Arsenal mjög vel og það gæti því verið góður kostur fyrir Unai Emery að fá hann á Emirates.





Marca segir að mesta leyndin hafi verið yfir áhuga Liverpool en að áhugi Evrópumeistaranna hafi aukist mikið síðustu vikurnar. Jürgen Klopp, knattspyrnustjóri Liverpool, á víst að sjá í Ceballos leikmanninn sem hann var að leita að þegar Liverpool keypti Naby Keita. Liverpool tekur aftur á móti ekki í mál að fá leikmanninn á láni eða að Real Madrid hafi forkaupsrétt á honum til baka.

Enski boltinn Spænski boltinn

Mest lesið


Fleiri fréttir

Sjá meira


×

Mest lesið