Fasteignagjöld víða hækkað ríflega frá 2013

Fasteignagjöld á íbúðarhúsnæði í 15 stærstu sveitarfélögum landsins hafa í mörgum tilfellum hækkað mikið á síðustu sex árum og í sumum tilfellum hafa þau meira en tvöfaldast. Ef marka má úttekt verðlagseftirlits ASÍ hafa mestar hækkanir orðið á fasteignasköttum, lóðaleigu og sorphirðugjöldum en jafnframt má finna miklar hækkanir í öllum gjaldaflokkum.

Í úttekt sinni, sem nálgast má í heild sinni á vef ASÍ, nefnir eftirlitið að í mörgum tilfellum hafi fasteignagjöld hækkað um eða yfir 50% og í þó nokkrum tilfellum um 70-100%.

„Sem dæmi um hækkanir á fasteignagjöldum á síðustu sex árum má nefna að fasteignaskattur í fjölbýli hækkar mest í Keflavík, Reykjanesbæ um 136%, hækkun á fráveitugjöldum í fjölbýli er mest 128,4% hjá Seltjarnarneskaupstað og hækkun á lóðaleigu í fjölbýli 122,4% í Keflavík, Reykjanesbæ. Vatnsgjald hefur á tímabilinu hækkað mest í fjölbýli á Selfossi, Sveitarfélaginu Árborg um 69,5% og sorphirðugjald um 114,2% hjá Seltjarnarnesbæ,“ segir í úttektinni.

Nánar má fræðast um málið á vef ASÍ, þar sem m.a. má finna töflur með samanburði á hækkununum eftir sveitarfélögum, breytingar á álaningu þeirra og samtals breytingu á innheimtum fasteignagjöldum þar sem tillit er tekið til breytinga á fasteigna- og lóðamati frá árinu 2013.