Pissaði á farangur hótelgests

Lögreglan á höfuðborgarsvæðinu hafði í ýmis horn að líta á vaktinni í nótt. Þrír voru teknir fyrir ölvunar- og fíkniefnaakstur í austurborginni og var tilkynnt um innbrot í tvær bifreiðar í miðborginni. Úr annarri þeirra var stolið myndavélum og talsvert af fatnaði.

Einhverjir voru komnir í snemmbúið helgarstuð, en lögreglan sinnti nokkrum útköllum þar sem kvartað var undan partýhávaða. Þá var lögreglan kölluð að hóteli í miðborginni, en þar hafði gestur pissað á farangur hjá öðrum hótelgesti. Ekki er vitað hvort atvikið megi rekja til kvikindisskap gerandans eða óheppilegs slyss.

Þá aðstoðaði lögreglan ungan mann við komast aftur á gististað sinn í umdæminu í nótt. Sá hafðist við í tjaldi og virðist hafa tapað áttum á kvöldgöngunni því hann rataði ekki til baka. Úr málum hans tókst að leysa og vonandi fékk maðurinn góðan nætursvefn í tjaldinu.