Reyndasti leikmaður ÍA frá út tímabilið

Arnar Már Guðjónsson leikur ekki meira með ÍA á tímabilinu.

Hann sleit fremra krossband í hné í leik gegn Val á sunnudaginn. Auk þess er hann með rifu í liðþófa. Arnar greindi frá þessu á Facebook í dag.

Arnar hefur leikið 13 af 14 leikjum ÍA í Pepsi Max-deildinni á tímabilinu. Hann er reyndasti leikmaður ÍA en hann á að baki 113 leiki með félaginu í efstu deild.

ÍA keypti miðjumanninn Sindra Snæ Magnússon frá ÍBV í gær. Honum er væntanlega ætlað að fylla skarð Arnars.

Skagamenn eru í 3. sæti deildarinnar með 22 stig. Næsti leikur þeirra er gegn FH-ingum í Kaplakrika á þriðjudaginn.